ബെംഗളൂരു: ഉദ്ഘാടനത്തിനു മുന്നോടിയായി നമ്മ മെട്രോ ആർവി റോഡ്-ബൊമ്മസന്ദ്ര യെലോ ലൈനിൽ ബെംഗളൂരു നഗര വികസനത്തിന്റെ ചുമതലയുള്ള ഉപമുഖ്യമന്ത്രി ഡി.കെ. ശിവകുമാർ യാത്ര നടത്തി. ഓഗസ്റ്റ് 10ന് പ്രധാനമന്ത്രി നരേന്ദ്ര മോദി പാത ഉദ്ഘാടനം ചെയ്യും. 11 മുതലാകും പൊതുജനങ്ങൾക്കുള്ള സർവീസ് ആരംഭിക്കുക.
ബെംഗളൂരു ഐഐഎമ്മിൽ നടക്കുന്ന ഉദ്ഘാടന ചടങ്ങിനു പിന്നാലെ പ്രധാനമന്ത്രിയും മുഖ്യമന്ത്രി സിദ്ധരാമയ്യയും മറ്റു ജനപ്രതിനിധികളും പാതയിലൂടെ ട്രെയിൻ യാത്ര നടത്തുമെന്നും ശിവകുമാർ അറിയിച്ചു. ആദ്യ ഘട്ടത്തിൽ 3 ട്രെയിനുകൾ 25 മിനിറ്റ് ഇടവേളയിലാകും സർവീസ് നടത്തുക. നാലാമത്തെ ട്രെയിൻ ഈ മാസം ലഭിക്കുന്നതോടെ ഇടവേള 20 മിനിറ്റായി കുറയ്ക്കും. കൂടുതൽ ട്രെയിനുകൾ ലഭിക്കുന്ന മുറയ്ക്ക് ഇതു 10 മിനിറ്റാക്കുമെന്നും ശിവകുമാർ പറഞ്ഞു.
പാതകളിൽ ഡബിൾ ഡെക്കർ മേൽപാലങ്ങൾ
നിർമിക്കാനിരിക്കുന്ന എല്ലാ മെട്രോ പാതകളിലും ഡബിൾ ഡെക്കർ മേൽപാലങ്ങൾ നിർമിക്കുമെന്ന് ശിവകുമാർ വ്യക്തമാക്കി. ഇതിനായി കൂടുതൽ ഫണ്ട് അനുവദിക്കാൻ പ്രധാനമന്ത്രിയോടു ആവശ്യപ്പെടും. എല്ലാ മെട്രോ സ്റ്റേഷനുകളിലും 3 മുതൽ 4 ഏക്കർ ഭൂമി വാങ്ങി പാർക്കിങ് കേന്ദ്രം സ്ഥാപിക്കാൻ ബിഎംആർസിക്കു നിർദേശം നൽകിയതായും അദ്ദേഹം പറഞ്ഞു.
SUMMARY: DK Shivakumar takes a Yellow Line metro trip ahead of its inauguration.
