ബെംഗളൂരു: ബെംഗളൂരു റൂറൽ ജില്ലയിലെ ദൊഡ്ഡബല്ലാപ്പുരില്‍ റെയില്‍വേ ട്രാക്ക് മുറിച്ചുകടക്കുന്നതിനിടെ ട്രെയിന്‍ തട്ടി മുത്തശ്ശിയും രണ്ട് പേരക്കുട്ടികളും മരിച്ചു. ഇന്ന് രാവിലെയാണ് ദാരുണമായ സംഭവം നടന്നത്. പാലനജോഗഹള്ളി സ്വദേശികളായ ഇര്‍ഫാന (46), റൂകിയ (13), റാകിയ (8) എന്നിവരാണ് അപകടത്തില്‍ മരിച്ചത്.
അവധിക്കാലം ചെലവഴിക്കാന്‍ ഹിന്ദുപൂരില്‍ നിന്ന് മുത്തശ്ശിയുടെ വീട്ടിലേക്ക് എത്തിയതായിരുന്നു കുട്ടികള്‍. അവധി കഴിഞ്ഞ് സ്‌കൂളില്‍ പോകാനായി മുത്തശ്ശിക്കൊപ്പം തിരികെ മടങ്ങുന്നതിനിടെ അപകടമുണ്ടായത്. റെയില്‍വേ സ്റ്റേഷനില്‍ മേല്‍പ്പാലം ഇല്ലാത്തതിനെ തുടര്‍ന്ന് ട്രെയിന്‍ കയറാനായി ട്രാക്ക് മുറിച്ചുകടക്കുമ്പോഴാണ് അപകടമുണ്ടായത്. യശ്വന്ത്പൂര റെയില്‍വേ പോലീസ് സംഭവത്തില്‍ അന്വേഷണം ആരംഭിച്ചു.
SUMMARY: Grandmother and two grandchildren die after being hit by a train; Accident while crossing the track
