ബെംഗളൂരു: ബെംഗളൂരുവിലെ സ്വകാര്യ ഹോട്ടലിൽ മാലിദ്വീപ് പൗരനെ മരിച്ച നിലയിൽ കണ്ടെത്തി. ആർടി നഗറിലെ ഹോട്ടൽ മുറിയിൽ ഹസൻ സോഹൈലിനെയാണ് (43) മരിച്ച നിലയിൽ കണ്ടത്. ഹൃദയാഘാതമാണ് മരണകാരണമെന്നാണ് പോലീസിന്റെ പ്രാഥമിക നിഗമനം.
നവംബർ 10നാണ് സോഹൈൽ ഇന്ത്യയിൽ എത്തിയത്. ഹോട്ടൽ ബുക്ക്‌ ചെയ്തപ്പോൾ ബുധനാഴ്ച ചെക്ക് ഔട്ട് ചെയ്യുമെന്നായിരുന്നു ജീവനക്കാരെ അറിയിച്ചത്. എന്നാൽ വ്യാഴാഴ്ച വൈകീട്ട് ആയിട്ടും സോഹൈൽ ഹോട്ടൽ മുറിയിൽ നിന്ന് പുറത്തിറങ്ങാത്തതിൽ സംശയം തോന്നിയ ജീവനക്കാർ പോലീസിൽ വിവരം അറിയിക്കുകയായിരുന്നു.
ഹോട്ടലിൽ എത്തിയ പോലീസ് സംഘം സ്പെയർ കീ ഉപയോഗിച്ച് മുറി തുറന്നു. അബോധാവസ്ഥയിൽ കണ്ടെത്തിയ സോഹൈലിനെ ആശുപത്രിയിൽ എത്തിച്ചെങ്കിലും മരണപ്പെട്ടതായി ഡോക്ടർമാർ അറിയിക്കുകയായിരുന്നു. സംഭവത്തെക്കുറിച്ച് ആർടി നഗർ പോലീസ് മാലിദ്വീപ് ഹൈക്കമ്മീഷനെയും ഇമിഗ്രേഷൻ ഓഫീസിനെയും അറിയിച്ചു.
ഇയാളുടെ കുടുംബം വൈകാതെ ബെംഗളൂരുവിലെത്തുമെന്ന് പോലീസ് പറഞ്ഞു. നവംബർ 15ന് മാലിദ്വീപിലേക്ക് മടങ്ങുന്നതിന് മുമ്പ് മധ്യപ്രദേശിലേക്കും മുംബൈയിലേക്കും പോകാനായിരുന്നു സൊഹൈൽ പദ്ധതിയിട്ടിരുന്നത്. സംഭവത്തിൽ അസ്വാഭാവിക മരണത്തിന് പോലീസ് കേസെടുത്തു.
TAGS: BENGALURU | DEATH
SUMMARY: Maldivian tourist found dead in Bengaluru hotel
