കള്ളപ്പണം വെളുപ്പിക്കൽ കേസ്; കോൺഗ്രസ് എംഎൽഎയുടെ വീട്ടിൽ ഇഡി റെയ്ഡ്

ബെംഗളൂരു: ഓണ്‍ലൈന്‍ വതുവെപ്പ്, ചൂതാട്ടം എന്നിവയുമായി ബന്ധപ്പെട്ട് കള്ളപ്പണം വെളുപ്പിക്കൽ കേസിൽ കോൺഗ്രസ് എംഎൽഎ കെ.സി. വീരേന്ദ്രയുടെയും ബന്ധുക്കളുടെയും വീടുകളിലും ഇവരുമായി ബന്ധപ്പെട്ട സ്ഥാപനങ്ങളിലും എൻഫോഴ്‌സ്‌മെന്റ് ഡയറക്ടറേറ്റ് (ഇഡി) റെയ്ഡ് നടത്തി.

ചിത്രദുർഗ ചല്ലാകരെയിലെ വീരേന്ദ്രയുടെയും സഹോദരൻ അടക്കമുള്ളവരുടെയും വീടുകൾക്കുപുറമേ ബെംഗളൂരു, ഹുബ്ബള്ളി, ഗോവ, മുംബൈ, ജോധ്പുർ തുടങ്ങിയിടങ്ങളിലുള്ള 30-ഓളം കേന്ദ്രങ്ങളിലും റെയ്ഡ് നടന്നു.

വീരേന്ദ്രയെ ചോദ്യം ചെയ്യാനായി കസ്റ്റഡിയിലെടുത്തു. ഗോവയിൽ പ്രവർത്തിക്കുന്ന കാസിനോകളിലൂടെ നേരിട്ടും ഓൺലൈനിലും അനധികൃതമായി ചൂതാട്ടം നടത്തിയെന്നാണ് കേസ്. വീരേന്ദ്രയുടെ ഗോവയിലെ കസിനോകളായ പപ്പീസ് കസീനോ ഗോൾഡ്, ഓഷൻ റി വേർസ് കസീനോ, പപ്പീസ് കസീനോ പരേഡ്, ഓഷൻ 7 കസീനോ, ബിഗ് ഡാഡി കസീനോ എന്നിവിടങ്ങളിലും റെയ്‌ഡ് നടത്തി. കിങ്സ് 567, രാജ 567, പപ്പീസ് 003, രത്ന ഗെയിമിങ് തുടങ്ങിയ ഓൺലൈൻ വാതുവയ്പ് സൈറ്റുകളും വീരേന്ദ്ര നടത്തുന്നതായാണ് വിവരം. ഇവിടങ്ങളിലും വെള്ളിയാഴ്ച പരിശോധന നടത്തി.

മുൻപ്‌ ജെഡിഎസിലായിരുന്ന വീരേന്ദ്ര കഴിഞ്ഞ നിയമസഭാ തിരഞ്ഞെടുപ്പിനു മുൻപാണ് കോൺഗ്രസിൽ ചേർന്നത്. ചിത്രദുർഗ നിയമസഭാ മണ്ഡലത്തിൽനിന്നാണ്‌ വിജയിച്ചത്‌.
SUMMARY: Money laundering case; ED raids Congress MLA’s house