ബെംഗളൂരു: ബെംഗളൂരുവിൽ വാട്ടർ ടാങ്കറിനുള്ളിൽ ഒന്നരവയസുകാരന്റെ മൃതദേഹം കണ്ടെത്തി. ആനേക്കൽ ചന്ദാപുരയ്ക്കടുത്തുള്ള ഇഗ്ഗലൂരിലാണ് സംഭവം. മനു – ഹർഷിത ദമ്പതികളുടെ മകനാണ് മരിച്ചത്. കൊലപാതകമാണെന്നാണ് പോലീസിന്റെ പ്രാഥമിക നിഗമനം.
ശ്വാസകോശ സംബന്ധമായ അസുഖത്തെ തുടർന്ന് കഴിഞ്ഞ ഏതാനും മാസങ്ങളായി കുട്ടി ആശുപത്രിയിൽ ചികിത്സയിലായിരുന്നു. ഒരാഴ്ച മുമ്പാണ് കുട്ടിയെ ഡിസ്ചാർജ് ചെയ്ത് വീട്ടിലെത്തിച്ചത്. തിങ്കളാഴ്ച ഉച്ചയോടെയാണ് കുട്ടിയെ മുറിയിൽ നിന്ന് കാണാതായതെന്ന് ഹർഷിത പോലീസിനോട് പറഞ്ഞു.
കുളിക്കാൻ പോയി തിരിച്ചു വന്നപ്പോൾ കുട്ടിയെ കാണാതാവുകയായിരുന്നു. വീടും പരിസരവും തിരഞ്ഞിട്ടും കുട്ടിയെ കണ്ടെത്താനായില്ല. പിന്നീട് ഇരുവരും പോലീസിൽ വിവരമറിയിച്ചു. പോലീസെത്തി നടത്തിയ തിരച്ചിലിലാണ് കുട്ടിയുടെ മൃതദേഹം വാട്ടർ ടാങ്കറിൽ നിന്ന് കണ്ടെടുത്തത്. സംഭവത്തിൽ ആനേക്കൽ പോലീസ് കേസെടുത്ത് അന്വേഷണം ആരംഭിച്ചു.
TAGS: BENGALURU | DEATH
SUMMARY: One-year-old child preterm baby found dead inside water tanker
