ഒരു നാടിൻ്റെ നൊമ്പരവും അഭിമാനവും; ആലിൻ ഷെറിൻ എബ്രഹാമിനെ മൻ കി ബാത്തില്‍ അനുസ്മരിച്ചു പ്രധാനമന്ത്രി

ഡല്‍ഹി: അവയവദാനത്തിലൂടെ നാലുപേർക്ക് പുതുജീവൻ നല്‍കി വിടവാങ്ങിയ കൊച്ചുമാലാഖ ആലിൻ ഷെറിനെ ‘മൻ കി ബാത്തില്‍’ അനുസ്മരിച്ച്‌ പ്രധാനമന്ത്രി നരേന്ദ്ര മോദി. സ്വന്തം കുഞ്ഞ് നഷ്ടപ്പെട്ട തീരാവേദനയ്ക്കിടയിലും മറ്റുള്ളവരുടെ കണ്ണീരൊപ്പാൻ തീരുമാനമെടുത്ത ആലിന്റെ രക്ഷിതാക്കളെ രാജ്യം ആദരവോടെ നമിക്കുന്നുവെന്ന് പ്രധാനമന്ത്രി പറഞ്ഞു.

‘ഏറെക്കാലം ജീവിച്ചിരിക്കേണ്ട കുഞ്ഞായിരുന്നു ആലിൻ. നിരവധി സ്വപ്നങ്ങള്‍ ബാക്കിവെച്ചാണ് ആ കുഞ്ഞ് പോയത്. എന്നാല്‍ ആലിൻ ഷെറിൻ എന്ന പേര് എന്നെന്നും ഓർമ്മിക്കപ്പെടും.’ ഒരു കുഞ്ഞിനെ നഷ്ടപ്പെടുന്നത് മാതാപിതാക്കളെ സംബന്ധിച്ച്‌ ലോകാവസാനത്തിന് തുല്യമാണ്. ആ വേദനയ്ക്കിടയിലും കുഞ്ഞിന്റെ അവയവങ്ങള്‍ ദാനം ചെയ്യാൻ തീരുമാനിച്ചത് മഹനീയമായ ചിന്തയുടെയും ഉറച്ച വ്യക്തിത്വത്തിന്റെയും പ്രതീകമാണെന്ന് മോദി ചൂണ്ടിക്കാട്ടി.

സ്വന്തം കുഞ്ഞ് നഷ്ടപ്പെട്ടപ്പോഴും നാല് കുടുംബങ്ങളില്‍ പ്രകാശം നിറയ്ക്കാനാണ് ആ രക്ഷിതാക്കള്‍ തീരുമാനിച്ചത്. ആ വലിയ മനസ്സിന് മുന്നില്‍ ഓരോ പൗരനും ശിരസ്സ് നമിക്കണം. അവയവദാന രംഗത്ത് ഇന്ത്യ കൈവരിച്ച നേട്ടങ്ങളെക്കുറിച്ചും പ്രധാനമന്ത്രി സംസാരിച്ചു. അവയവദാനം ഒരു മഹത്കൃത്യമാണെന്നും അത് എന്നും പ്രോത്സാഹിപ്പിക്കപ്പെടണമെന്നും അദ്ദേഹം പറഞ്ഞു. അവയവങ്ങള്‍ സ്വീകരിച്ച പലരും ഇന്ന് സാധാരണ ജീവിതത്തിലേക്ക് മടങ്ങിവരുന്നത് മെഡിക്കല്‍ ഗവേഷണ രംഗത്തെ പുരോഗതിയുടെ അടയാളമാണെന്നും അദ്ദേഹം കൂട്ടിച്ചേർത്തു.

SUMMARY: Prime Minister remembers Alin Sherin Abraham in Mann Ki Baat