ബെംഗളൂരു: ദക്ഷിണ കന്നഡ ജില്ലയിലെ പുത്തൂരിലെ അനധികൃത കോഴിപ്പോര് കേന്ദ്രത്തിൽ നടത്തിയ റെയ്ഡില്‍ മൂന്ന് പേര്‍ പിടിയിലായി. കൊയില സബലൂർ സ്വദേശി സതീഷ് (38), വിട്‌ല പഡ്‌നൂർ കടമ്പു സ്വദേശി മുരളി (30), കുടത്തഡ്കയിൽ താമസിക്കുന്ന മോനപ്പ കെ (36) എന്നിവരെയാണ് ഉപ്പിനങ്ങാടി പോലീസ് പിടികൂടിയത്. അഞ്ച് കോഴികളെ പിടികൂടുകയും ചെയ്തു.
ചൊവ്വാഴ്ച വൈകുന്നേരം പോലീസുകാര്‍ പട്രോളിംഗ് ഡ്യൂട്ടിയിലായിരിക്കെ. കോഴികളുടെ ശബ്ദം കേട്ട് സ്ഥലത്തെത്തി തിരച്ചല്‍ നടത്തിയപ്പോഴാണ് റോഡരികിൽ നിയമവിരുദ്ധമായി കോഴിപ്പോര് സംഘടിപ്പിക്കുന്നത് കണ്ടെത്തിയത്. പോലീനെ കണ്ടപ്പോള്‍ കോഴിപ്പോര് കാണാനായി സ്ഥലത്ത് തടിച്ചുകൂടിയ ആളുകള്‍ ഓടി രക്ഷപ്പെട്ടു. കോഴിപ്പോരിനായി കൊണ്ടുവന്ന അഞ്ച് കോഴികളെയും, രണ്ട് സെറ്റ് മൂർച്ചയുള്ള ബ്ലേഡുകളും വാതുവെപ്പിന് ഉപയോഗിച്ച 2,300 രൂപയും പോലീസ് പിടിച്ചെടുത്തു. സംഭവസ്ഥലത്ത് നിന്ന് ഒരു മോട്ടോർ സൈക്കിളും കസ്റ്റഡിയിലെടുത്തു. പരിപാടി സംഘടിപ്പിച്ച ആളുകള്‍ക്കെതിരെ കേസ് എടുത്ത പോലീസ് കൂടുതല്‍ അന്വേഷണം നടത്തിവരികയാണ്.
SUMMARY: Raid in illegal cockfight center; three arrested
