ഡല്ഹി: പശ്ചിമ ബംഗാളില് മമതാ ബാനർജിയുടെ നേതൃത്വത്തിലുള്ള തൃണമൂല് കോണ്ഗ്രസ് ഭരണത്തില് നിന്ന് പുറത്തായതിന് പിന്നാലെ പാർട്ടിയില് പ്രതിസന്ധി രൂക്ഷമാകുന്നു. തൃണമൂല് കോണ്ഗ്രസ് എംപി രുക്മിണി ‘കോയല്’ മല്ലിക് രാജ്യസഭാംഗത്വം രാജിവെച്ചു. ജൂലൈ 16 വ്യാഴാഴ്ച രാജ്യസഭാ ചെയർമാനെ നേരില് കണ്ട് അവർ രാജിപ്പത്രം സമർപ്പിച്ചു.
തന്റെ രാജ്യസഭാംഗത്വം ഉടനടി പ്രാബല്യത്തോടെ സ്വീകരിക്കണമെന്ന് രാജിപ്പത്രത്തില് ആവശ്യപ്പെട്ട അവർ, തന്റെ കാലാവധിയില് സഹകരിച്ച രാജ്യസഭാ ഡെപ്യൂട്ടി ചെയർമാനോടും മറ്റ് ഉദ്യോഗസ്ഥരോടും നന്ദി രേഖപ്പെടുത്തി. ബംഗാളില് ഭരണം നഷ്ടപ്പെട്ടതിന് ശേഷം രാജ്യസഭാംഗത്വം രാജിവെയ്ക്കുന്ന നാലാമത്തെ തൃണമൂല് കോണ്ഗ്രസ് എംപിയാണ് രുക്മിണി മല്ലിക്.
നേരത്തെ സുഖേന്ദു ശേഖർ റോയ്, സുസ്മിത ദേവ്, പ്രകാശ് ചിക് ബരാക് എന്നിവർ രാജ്യസഭയില് നിന്ന് രാജിവെച്ചിരുന്നു. മുതിർന്ന നേതാവ് മദൻ മിത്ര പാർട്ടി വിട്ട് വിമത പക്ഷത്ത് ചേർന്നതിന് പിന്നാലെയാണ് ഇപ്പോള് എംപിയുടെ രാജി എന്നതും തൃണമൂലിന് കനത്ത തിരിച്ചടിയായിട്ടുണ്ട്.
SUMMARY: TMC Rajya Sabha MP Rukmini Malik resigns
