ബെംഗളൂരു: ബെംഗളൂരുവിൽ നിയന്ത്രണം വിട്ട ട്രക്ക് നിരവധി വാഹനങ്ങളിലിടിച്ച് അപകടം. ശനിയാഴ്ച പുലർച്ചെ സാറ്റലൈറ്റ് ബസ് സ്റ്റേഷൻ റോഡിൽ കോൺക്രീറ്റ് മിക്സർ ട്രക്കാണ് അപകടത്തിൽ പെട്ടത്. മൈസൂരുവിലേക്ക് പോകുകയായിരുന്ന ട്രക്ക് മുമ്പിലുണ്ടായിരുന്ന കാർ, മൂന്ന് ഓട്ടോകൾ, ഒരു ബൈക്ക്, ഒരു ബസ് എന്നിവയുൾപ്പെടെയുള്ള വാഹനങ്ങളിൽ ഇടിച്ചുകയറി.
പുലർച്ചെ 5 മണിയോടെയാണ് അപകടം നടന്നത്. സംഭവത്തിൽ ട്രക്ക് ഡ്രൈവർ ജഗനാണ് മരിച്ചത്. ഗുരുതരമായി പരുക്കേറ്റ ജഗനെ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല.
അപകടത്തിൽ കാൽനടയാത്രക്കാരനായ മനോജ്, ഓട്ടോ ഡ്രൈവർ ചന്ദ് പാഷ എന്നിവർക്ക് പരുക്കേറ്റു. ഡ്രൈവറുടെ അശ്രദ്ധയും, അമിത വേഗതയുമാണ് അപകടകാരണമെന്ന് പോലീസ് പറഞ്ഞു. ട്രക്ക് ഡ്രൈവർ മദ്യപിച്ചതായാണ് പോലീസിന്റെ പ്രാഥമിക നിഗമനം. അപകടത്തിൽ ട്രക്കിന്റെ മുൻഭാഗം ഭാഗികമായി തകർന്നു. ഓട്ടോറിക്ഷ പൂർണ്ണമായും തകർന്നു. സംഭവത്തിൽ ബൈതരായണപുര ട്രാഫിക് പോലീസ് കേസെടുത്തു.
TAGS: BENGALURU | ACCIDENT
SUMMARY: Truck involved in serial accident on Mysuru Road, driver dies in hospital
