കനത്ത മഴയ്ക്ക് സാധ്യത; ബെംഗളൂരുവിൽ യെല്ലോ അലർട്ട്

ബെംഗളൂരു: കനത്ത മഴയ്ക്ക് സാധ്യതയുള്ളതിനാൽ ബെംഗളൂരുവിൽ അടുത്ത രണ്ട് ദിവസത്തേക്ക് യെല്ലോ അലർട്ട് പ്രഖ്യാപിച്ച് കാലാവസ്ഥ നിരീക്ഷണ കേന്ദ്രം (ഐഎംഡി). നഗരത്തിൽ വരും ദിവസങ്ങളിൽ ശക്തമായ മഴയ്ക്ക് സാധ്യതയുണ്ട്. ഏറ്റവും കൂടിയ താപനില 31 ഡിഗ്രി സെൽഷ്യസും, കുറഞ്ഞ താപനില 21 ഡിഗ്രി സെൽഷ്യസും ആയിരിക്കും. വെള്ളിയാഴ്ച വരെ നഗരത്തിൽ സമാന കാലാവസ്ഥ തുടരും.

ചൊവ്വാഴ്ച രാത്രി നഗരത്തിൻ്റെ വിവിധ ഭാഗങ്ങളിൽ പെയ്ത മഴയെ തുടർന്ന് പല റോഡുകളിലും വെള്ളം കയറുകയും ഗതാഗതം തടസപ്പെടുകയും ചെയ്തു. ജാലഹള്ളി മേൽപ്പാലത്തിന് സമീപമുള്ള ഗോരഗുണ്ടെപാൾയ ഭാഗത്തേക്കുള്ള റോഡ് ഉൾപ്പെടെ നിരവധി റോഡുകളിലും അടിപ്പാതകളിലും വെള്ളം കയറി. ബിബിഎംപിയുടെ ബൊമ്മനഹള്ളി, വെസ്റ്റ്, ഈസ്റ്റ്‌ മേഖലകളിലാണ് ഏറ്റവും കൂടുതൽ മഴ ലഭിച്ചത്. ബാഗലഗുണ്ടെയിൽ 49 മില്ലീമീറ്ററും ചൊക്കസാന്ദ്രയിൽ 43 മില്ലീമീറ്ററും ഷെട്ടിഹള്ളിയിൽ 28 മില്ലീമീറ്ററും മഴ ലഭിച്ചു. നഗരത്തിൽ രാത്രി 11.30 വരെ 17.4 മില്ലിമീറ്റർ മഴ ലഭിച്ചിട്ടുണ്ട്.

TAGS: BENGALURU | RAIN
SUMMARY: City to recieve heavy rainfall for upcoming days, yellow alert declared