കർണാടകയിൽ ഇതാദ്യം; പൊതുസുരക്ഷ വർധിപ്പിക്കാൻ ഡ്രോണുകൾ ഉപയോഗിക്കും

ബെംഗളൂരു: സംസ്ഥാനത്ത് ആദ്യമായി പൊതുസുരക്ഷ വർധിപ്പിക്കുന്നതിനായി ഡ്രോണുകൾ ഉപയോഗിക്കാനൊരുങ്ങി പോലീസ്. ആധുനികവൽക്കരണ പദ്ധതിയുടെ ഭാഗമായി 80-100 തദ്ദേശീയ ഡ്രോണുകൾക്കായി 4 കോടി രൂപ ചെലവിൽ ടെൻഡർ ക്ഷണിക്കാനുള്ള ശ്രമത്തിലാണ് പോലീസ് എന്ന് കമ്മ്യൂണിക്കേഷൻ, ലോജിസ്റ്റിക്‌സ് ആൻഡ് മോഡേണൈസേഷൻ (സിഎൽഎം) അഡീഷണൽ ഡയറക്ടർ ജനറൽ എസ്. മുരുകൻ പറഞ്ഞു.

പൊതു സുരക്ഷ മെച്ചപ്പെടുത്തൽ, രക്ഷാപ്രവർത്തനം, നിയമവിരുദ്ധവും ദേശവിരുദ്ധവുമായ കാര്യങ്ങളിൽ നിരീക്ഷണം തുടങ്ങി വിവിധ പ്രവർത്തനങ്ങളിൽ ഡ്രോണുകൾ ഉപയോഗപ്പെടുത്തും. നിയമ നിർവ്വഹണ പ്രവർത്തനങ്ങളിൽ ഡ്രോണുകളുടെ ഉപയോഗം പുതിയ കാര്യമല്ല. എന്നാൽ കാര്യക്ഷമമായ പോലീസ് നടപടികൾക്കും, പൊതുസുരക്ഷ വർധിപ്പിക്കുന്നതിനുമായി ഡ്രോണുകൾ ഉപയോഗിക്കുന്നത് ഇതാദ്യമാണ്.

ഇൻ്റേണൽ സെക്യൂരിറ്റി ഡിവിഷൻ്റെ (ഐഎസ്ഡി) ഭീകരവിരുദ്ധ ടീമുകൾ (സിസിടി) ഡ്രോണുകൾ ഉപയോഗിക്കാൻ പോലീസ് ഉദ്യോഗസ്ഥരെ പരിശീലിപ്പിക്കും. ഇതിനായി ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (ഡിജിസിഎ) പോലീസിന് അനുമതി നൽകിയിട്ടുണ്ട്.

TAGS: BENGALURU | DRONES
SUMMARY: Karnataka police set to get 100 drones