കാറിനുള്ളില് സ്വിമ്മിംഗ് പൂളില് കുളിച്ചുള്ള യാത്ര നടത്തി സമൂഹമാധ്യമങ്ങളില് പങ്കുവെച്ച യൂട്യൂബര് സഞ്ജു ടെക്കിക്കെതിരെ നടപടി സ്വീകരിക്കുമെന്ന് സര്ക്കാര് ഹൈക്കോടതിയില്. വാഹനത്തിന്റെ രജിസ്ട്രേഷന് റദ്ദാക്കുമെന്നും ലൈസന്സ് ഒരു വര്ഷത്തേക്ക് സസ്പെന്റ് ചെയ്യുമെന്നും സര്ക്കാര് ഹൈക്കോടതിയെ അറിയിച്ചു.
ദൃശ്യങ്ങള് യൂട്യൂബില് പോസ്റ്റ് ചെയ്തതിന് ക്രിമിനല് കേസെടുക്കുമെന്നും പിഴ ഈടാക്കുമെന്നും സര്ക്കാര് വ്യക്തമാക്കി. സര്ക്കാര് ഹൈക്കോടതിയില് സമര്പ്പിച്ച് നടപടി റിപോര്ട്ടിലാണ് ഈ കാര്യങ്ങള് ഉള്ളത്. നിയമ ലംഘനങ്ങള് നടത്തുന്ന വാഹനങ്ങള്ക്കെതിരെ കര്ശന നടപടി സ്വീകരിക്കുമെന്നും മോട്ടോര് വാഹന വകുപ്പ് അറിയിച്ചു.
സഞ്ജുവും കാര് ഓടിച്ച സൂര്യനാരായണന് എന്നിവരെ പ്രതി ചേര്ത്താണ് ആലപ്പുഴ മജിസ്ട്രേറ്റ് കോടതിയില് എന്ഫോഴ്സ്മെന്റ് ആര്ടിഓ കുറ്റപത്രം തയ്യാറാക്കിയിരിക്കുന്നത്. ആറ് മാസം മുതല് ഒരുവര്ഷം വരെ ജയില് ശിക്ഷ ലഭിക്കാവുന്ന അപകടമുണ്ടാക്കുന്ന രീതിയില് വണ്ടിയോടിച്ചുവെന്ന കുറ്റമാണ് പ്രതികള്ക്കെതിരെ ചുമത്തിയിരിക്കുന്നത്. സുരക്ഷിതമല്ലാത്ത വാഹനം റോഡില് ഓടിച്ചതിനുള്ള വകുപ്പും ചുമത്തി. ഈ കുറ്റത്തിന് മൂന്ന് മാസം തടവ് ശിക്ഷ ലഭിക്കാം. കേസില് പ്രതികള് കോടതിയില് വിചാരണ നേരിടണം.
യൂട്യൂബില് 4 ലക്ഷം ഫോളോവേഴ്സുള്ള സഞ്ജു ടെക്കി രണ്ടാഴ്ച മുമ്പാണ് സ്വന്തം വാഹനമായ ടാറ്റാ സഫാരിയില് സ്വിമ്മിംഗ് പൂളൊരുക്കിയത്. കാറിന് നടുവിലെ രണ്ട് സീറ്റുകള് മാറ്റി പകരം പ്ലാസ്റ്റിക് ടർപോളിൻ കൊണ്ട് സ്വിമ്മിംഗ് പൂള് തയ്യാറാക്കി. തുടർന്ന് മൂന്ന് സുഹൃത്തുക്കള്ക്കൊപ്പം അമ്പലപ്പുഴയിലെ റോഡിലൂടെ കാറിനുള്ളില് കുളിച്ചു കൊണ്ട് യാത്ര ചെയ്തു. ഇതിൻ്റെ ദൃശ്യങ്ങള് ട്യൂബില് പോസ്റ്റ് ചെയ്തു.
യാത്രക്കിടെ ടര്പോളിന് ചോര്ച്ചയുണ്ടായി വെള്ളം കാറിനുള്ളില് പടർന്നു. എൻജിനിലടക്കം വെള്ളം കയറി. വശത്തെ സീറ്റിലെ എയർ ബാഗ് പൊട്ടിത്തെറിക്കുകയും ചെയ്തു. ഇതോടെ ഇവർ വെള്ളം മുഴുവൻ റോഡിലേയ്ക്ക് ഒഴുക്കിവിട്ടു. യൂട്യൂബിലെ ദൃശ്യങ്ങള് ശ്രദ്ധയില്പ്പെട്ട ആർടിഒ എൻഫോഴ്സ്മെൻ്റ് വിഭാഗം കാർ കസ്റ്റഡിയിലെടുക്കുകയായിരുന്നു.
TAGS: SANJU TECHY, HIGHCOURT
KEYWORDS: The government will take action against Sanju Techi in the High Court
WhatsApp
Telegram
