ഈസ്റ്റർ, വേനലവധി: ബെംഗളൂരുവില്‍ നിന്ന് കണ്ണൂര്‍ വഴി മംഗളൂരുവിലേക്ക് സ്പെഷ്യല്‍ ട്രെയിന്‍

ബെംഗളൂരു : ഈസ്റ്റർ, മധ്യവേനലവധിയോടനുബന്ധിച്ചുള്ള യാത്രാത്തിരക്ക് പരിഗണിച്ച് ബെംഗളൂരുവില്‍ നിന്ന് കേരളത്തിലൂടെ മംഗളൂരുവിലേക്ക് സ്പെഷ്യല്‍ ട്രെയിന്‍ അനുവദിച്ച് റെയില്‍വേ. 17-ന് എസ്എംവിടി ബെംഗളൂരുവിൽ നിന്നും മംഗളൂരു ജങ്ഷനിലെക്കും 20 ന് മംഗളൂരു ജങ്ഷനില്‍ നിന്ന് എസ്എംവിടി ബെംഗളൂരുവിലേക്കുമാണ് സര്‍വീസ് നടത്തുക.

എസ്എംവിടി ബെംഗളൂരു-മംഗളൂരു ജങ്ഷൻ എക്സ്‌പ്രസ് (06579) പെസഹാ വ്യാഴാഴ്ച രാത്രി 11.55-ന് പുറപ്പെട്ട് വെള്ളിയാഴ്ച വൈകീട്ട് നാലിന് മംഗളൂരുവിലെത്തും. തിരിച്ച് 20 ന് ഞായറാഴ്ച ഉച്ചയ്ക്ക് 2.10-ന് പുറപ്പെട്ട് (മംഗളൂരു ജങ്ഷൻ-എസ്എംവിടി ബെംഗളൂരു എക്സ്‌പ്രസ് -06580) തിങ്കളാഴ്ച രാവിലെ 7.30-ന് ബെംഗളൂരുവിലെത്തും. കൃഷ്ണരാജപുരം, ബംഗാരപ്പേട്ട്, കുപ്പം, സേലം, ഈറോഡ്, തിരുപ്പൂർ, പോഡനൂർ, പാലക്കാട്, ഷൊർണൂർ, തിരൂർ, കോഴിക്കോട്, വടകര, തലശ്ശേരി, കണ്ണൂർ, പയ്യന്നൂർ, കാഞ്ഞങ്ങാട്, കാസറഗോഡ്‌ എന്നിവിടങ്ങളിലാണ് സ്റ്റോപ്പുകള്‍. റിസര്‍വേഷന്‍ ആരംഭിച്ചിട്ടുണ്ട്.