ട്രാക്ടർ മറിഞ്ഞ് തടാകത്തിലേക്ക് വീണു ഒമ്പത് വയസുകാരി മരിച്ചു

ബെംഗളൂരു: ട്രാക്ടർ മറിഞ്ഞ് തടാകത്തിലേക്ക് വീണതിനെ തുടർന്ന് ഒമ്പത് വയസുകാരി മരിച്ചു. ഈസ്റ്റ്‌ ബെംഗളൂരുവിലെ വൈറ്റ്ഫീൽഡിലാണ് സംഭവം. ഇസിനാക ഭട്ട് ആണ് മരിച്ചത്. അപകടത്തിൽ ഇസിനാകയുടെ ആറ് വയസുകാരിയായ സഹോദരിക്ക് ഗുരുതര പരുക്കേറ്റു.

അച്ഛൻ ഓടിച്ച ട്രാക്ടർ ആണ് കുട്ടികളുടെ മേൽ മറിഞ്ഞുവീണത്. ഇസിനാക ഭട്ടും സഹോദരിയും വീട്ടിലേക്ക് പോകുന്നതിനായാണ് പിതാവിന്റെ ട്രാക്ടറിൽ കയറിയത്. പട്ടണ്ടൂർ അഗ്രഹാര തടാകത്തിന്റെ മുകളിലേക്കുള്ള ചരിവിൽ എത്തിയപ്പോൾ വാഹനത്തിന്റെ നിയന്ത്രണം നഷ്ടപ്പെട്ട് മറിയുകയും തടാകത്തിലേക്ക് വീഴുകയും ചെയ്തു. ഇസിനാക ട്രാക്ടറിനടിയിൽ പെട്ട് സംഭവസ്ഥലത്ത് തന്നെ മരിച്ചു.

അച്ഛനും അനുജത്തിക്കും ഗുരുതര പരുക്കേറ്റു. ഇവരെ സമീപത്തെ ആശുപത്രിയിൽ പ്രവേശിപ്പിച്ചു. അമിത വേഗതയും അശ്രദ്ധമായ ഡ്രൈവിങ്ങുമാണ് അപകടത്തിന് കാരണമെന്ന് പ്രാഥമിക അന്വേഷണത്തിൽ തെളിഞ്ഞതായി പോലീസ് പറഞ്ഞു. സംഭവത്തിൽ വൈറ്റ്ഫീൽഡ് ട്രാഫിക് പോലീസ് കേസെടുത്തു.

TAGS: ACCIDENT | KARNATAKA
SUMMARY: 9-year-old girl dies after father’s tractor flips and falls into lake