തിരുവനന്തപുരം: ബിഗ് ബോസ് താരവും കുണ്ടറയിലെ ബിജെപി സ്ഥാനാർത്ഥിയുമായ ഡോ. റോബിൻ രാധാകൃഷ്ണന്റെ മാതാവ് ബീന അന്തരിച്ചു. ക്യാൻസർ ബാധിതയായതിനെ തുടർന്ന് കഴിഞ്ഞ കുറച്ച് കാലങ്ങളായി ചികിത്സയിലായിരുന്നു. രോഗം മൂർച്ഛിച്ചതിന് പിന്നാലെയായിരുന്നു അന്ത്യം. സോഷ്യല് മീഡിയയിലൂടെ റോബിൻ രാധാകൃഷ്ണൻ തന്നെയാണ് വിയോഗ വാർത്ത പങ്കുവച്ചത്.
‘2026 മാർച്ച് 25ന് ആണ് നമ്മുടെ പ്രിയപ്പെട്ട അമ്മയ്ക്ക് ‘സ്റ്റേജ് ഐ.വി.ബി എൻഡോമെട്രിയല് കാർസിനോമ’ സ്ഥിരീകരിച്ചത്. ഏറെക്കാലത്തെ പോരാട്ടത്തിനൊടുവില്, ജൂലൈ മൂന്നിന് പുലർച്ചെ ഒരു മണിക്കാണ് അമ്മ വിടവാങ്ങിയത്. ‘കാൻസർ അമ്മയുടെ ശരീരത്തെ കീഴടക്കിയെങ്കിലും, അമ്മയുടെ മനക്കരുത്തിനെയോ സ്നേഹത്തെയോ പരാജയപ്പെടുത്താൻ അതിനായില്ല. അവസാന ശ്വാസം വരെ അമ്മ ധീരമായി പൊരുതി,’ റോബിൻ കുറിച്ചു.
റോബിന്റെ ആരാധകർക്ക് ഏറെ സുപരിചിതയായിരുന്നു ബീന. സോഷ്യല് മീഡിയ പോസ്റ്റുകളിലൂടെ അമ്മയും മകനും തമ്മിലുള്ള ആത്മബന്ധം പലതവണ റോബിൻ പങ്കുവെച്ചിട്ടുണ്ട്. കഠിനമായ രോഗാവസ്ഥയിലും പ്രതീക്ഷ കൈവിടാതെ ജീവിച്ച അമ്മയുടെ ഓർമ്മകള് തങ്ങള്ക്ക് എന്നും വഴികാട്ടിയാകുമെന്ന് റോബിൻ കൂട്ടിച്ചേർത്തു. നിരവധി പേരാണ് റോബിന്റെ ദുഃഖത്തില് പങ്കുചേർന്ന് ആദരാഞ്ജലികള് അർപ്പിച്ചത്.
SUMMARY: Bigg Boss star Robin Radhakrishnan’s mother has passed away
