ക്വറ്റ: പാകിസ്ഥാനിലെ ബലൂചിസ്ഥാൻ പ്രവിശ്യയിലുണ്ടായ ഉഗ്ര സ്ഫോടനത്തില്‍ 24 പേർ കൊല്ലപ്പെടുകയും അമ്പതിലധികം ആളുകള്‍ക്ക് ഗുരുതരമായി പരുക്കേല്‍ക്കുകയും ചെയ്തു. ഈദ് അവധി ആഘോഷിക്കാനായി യാത്ര തിരിച്ച സൈനികർ സഞ്ചരിച്ച ട്രെയിൻ ലക്ഷ്യമിട്ടാണ് സ്ഫോടനം നടത്തിയത്. കൊല്ലപ്പെട്ടവരില്‍ സൈനികരും ഉള്‍പ്പെടുന്നതായി അന്താരാഷ്ട്ര വാർത്താ ഏജൻസിയായ എഎഫ്പി റിപ്പോർട്ട് ചെയ്യുന്നത്.
ക്വറ്റയിലെ ചമൻ ഫടക് റെയില്‍വേ സ്റ്റേഷന് സമീപമാണ് രാജ്യാന്തര തലത്തില്‍ ഞെട്ടലുണ്ടാക്കിയ ഈ ദുരന്തം സംഭവിച്ചത്. ക്വറ്റയില്‍ നിന്നും പെഷാവറിലേക്ക് പോവുകയായിരുന്ന ട്രെയിൻ സ്റ്റേഷൻ കടന്നുപോകുന്നതിനിടെ ബോഗിയിലേക്ക് സ്ഫോടകവസ്തു ഘടിപ്പിച്ച ഉപകരണം വന്നിടിച്ചതാണ് വൻ ദുരന്തത്തിന് കാരണമായതെന്ന് ഔദ്യോഗിക വൃത്തങ്ങള്‍ അറിയിച്ചു. സ്ഫോടനത്തിന്റെ ആഘാതത്തില്‍ ട്രെയിനിന്റെ ബോഗികള്‍ ഭാഗികമായി തകരുകയും പാളം തെറ്റുകയും ചെയ്തു.
റെയില്‍വേ സ്റ്റേഷന് സമീപത്ത് പാർക്ക് ചെയ്തിരുന്ന പത്തോളം വാഹനങ്ങള്‍ പൂർണ്ണമായും തകർന്നു. കൂടാതെ പരിസരത്തെ കെട്ടിടങ്ങളുടെ ജനലുകളും ഗ്ലാസ് പാനലുകളും സ്ഫോടനത്തിന്റെ ശക്തിയില്‍ പൊട്ടിച്ചിതറിയതായി പാക് മാധ്യമമായ ജിയോ ടിവി റിപ്പോർട്ട് ചെയ്യുന്നു. അപകടസ്ഥലത്തു നിന്നും പുകപടലങ്ങള്‍ ഉയരുന്നതിന്റെയും തകർന്ന ബോഗികളുടെയും ദൃശ്യങ്ങള്‍ ഇതിനോടകം പുറത്തുവന്നിട്ടുണ്ട്.
സ്ഫോടനത്തെ തുടർന്ന് ക്വറ്റയിലെ എല്ലാ സർക്കാർ ആശുപത്രികളിലും അടിയന്തരാവസ്ഥ പ്രഖ്യാപിച്ചു. പരുക്കേറ്റവർക്ക് അടിയന്തര ചികിത്സ ലഭ്യമാക്കുന്നതിനായി കൂടുതല്‍ ഡോക്ടർമാരെയും ആരോഗ്യപ്രവർത്തകരെയും ദുരന്തബാധിത പ്രദേശങ്ങളിലെ ആശുപത്രികളില്‍ നിയോഗിച്ചിട്ടുണ്ടെന്നും അധികൃതർ വ്യക്തമാക്കി.
SUMMARY: Massive explosion near railway track in Pakistan; 24 killed
