ബെംഗളൂരു: ലോകപ്രശസ്തമായ മൈസൂരു ദസറയുടെ ഈ വര്‍ഷത്തെ ഷെഡ്യൂൾ പ്രഖ്യാപിച്ചു. ഇത്തവണ ഒക്ടോബർ 11 മുതൽ 21 വരെ 11 ദിവസങ്ങളിലായാണ് ദസറ ആഘോഷങ്ങൾ നടക്കുക. ഒക്ടോബർ 11-ന് ഉദ്ഘാടനവും ഒക്ടോബർ 21-ന് വിജയദശമി ദിനത്തിൽ ജംബൂ സവാരിയും നടക്കും.
വിധാനസൗധയിൽ നടന്ന ദസറ മുന്നൊരുക്ക യോഗത്തിന് ശേഷം ഉപമുഖ്യമന്ത്രി ഡി.കെ. ശിവകുമാർ ആഘോഷങ്ങളുടെ പ്രധാന തീരുമാനങ്ങൾ പ്രഖ്യാപിച്ചു. വരൾച്ചയുണ്ടെങ്കിലും ദസറയുടെ പാരമ്പര്യത്തിനും പ്രൗഢിക്കും യാതൊരു കുറവും വരുത്താതെ ആഘോഷങ്ങൾ സംഘടിപ്പിക്കുമെന്ന് അദ്ദേഹം പറഞ്ഞു. ഇത്തവണ ഇന്ത്യൻ വ്യോമസേനയുടെ എയർ ഷോ സംഘടിപ്പിക്കാൻ കേന്ദ്രസർക്കാരിനോട് അഭ്യർഥിച്ചിട്ടുണ്ടെന്നും, കർണാടകയുടെ സാംസ്കാരിക പൈതൃകം കൂടുതൽ പ്രതിഫലിപ്പിക്കുന്ന പുതിയ പരിപാടികളും ഉൾപ്പെടുത്താൻ സർക്കാർ തീരുമാനിച്ചിട്ടുണ്ടെന്നും അദ്ദേഹം അറിയിച്ചു.
ദസറ ഉദ്ഘാടനം നിർവഹിക്കുന്ന വിശിഷ്ടാതിഥിയെ പിന്നീട് തീരുമാനിക്കുമെന്നും വ്യക്തമാക്കി. ലോകമെമ്പാടുമുള്ള വിനോദസഞ്ചാരികളെ ആകർഷിക്കുന്ന മൈസൂരു ദസറ കർണാടകയുടെ ഏറ്റവും വലിയ സാംസ്കാരികോത്സവമാണ്. ജംബൂ സവാരി, രാജകൊട്ടാരത്തിന്റെ ദീപാലങ്കാരം, സാംസ്കാരിക പരിപാടികൾ, യുവദസറ, ഭക്ഷ്യമേള, പ്രദർശനങ്ങൾ എന്നിവ ഇത്തവണയും പ്രധാന ആകർഷണങ്ങളായിരിക്കും.
SUMMARY: Mysore Dussehra schedule announced; Celebrations from October 11 to 21
