ന്യൂഡൽഹി: മുഖ്യ തിരഞ്ഞെടുപ്പ്‌ കമീഷണർ ഗ്യാനേഷ്‌കുമാറിന്റെ രാജിയാവശ്യപ്പെട്ട്‌ സിജെപി ആഹ്വാനം ചെയ്ത തിരംഗാ മാർച്ച്‌ ഇന്ന് നടക്കും എസ്‌എഫ്‌ഐ, ഐസ, എഐഎസ്‌എഫ്‌ എന്നിവയും പങ്കെടുക്കും. ഡൽഹി കൊണാട്ട് പ്ലേസിലെ സെൻട്രൽ പാർക്കിൽ വൈകിട്ട്‌ അഞ്ചിനാണ്‌ തിരംഗാ മാർച്ച്‌ പ്രഖ്യാപിച്ചത്‌. ജന്തർമന്തറിൽ ദേശീയപതാക ഉയർത്തി പ്രതിഷേധിച്ചതിന് സിജെപി സഹകൺവീനർമാരായ സ‍ൗരവ്‌ ദാസ്‌, അശുതോഷ്‌ റംക എന്നിവർ അറസ്റ്റിലായതിനെത്തുടർന്നാണ്‌ മാർച്ച്‌.
അതേസമയം സിജെപി പ്രതിഷേധം കണക്കിലെടുത്ത് ഡൽഹിയിൽ വൻ സുരക്ഷ. അതിർത്തികളിൽ ജാഗ്രതാ നിർദ്ദേശവും നൽകിയിട്ടുണ്ട്. അർദ്ധ സൈനിക വിഭാഗം ഉൾപ്പെടെ 20,000-ത്തോളം സുരക്ഷാ ഉദ്യോഗസ്ഥരെ വിവിധ ഇടങ്ങളിൽ നിയോഗിക്കും. അതേസമയം, കൊണാട്ട് പ്ലേസിൽ പോലീസ് സുരക്ഷ കൂട്ടി. സിജെപി പ്രതിഷേധം കണക്കിലെടുത്താണ് സുരക്ഷ വർധിപ്പിച്ചത് പ്രതിഷേധം നേരിടാൻ വൻ സന്നാഹമാണ്‌ ഒരുക്കുന്നത്‌. വെള്ളിയാഴ്‌ച കൊണാട്ട് പ്ലേസിലും പരിസരങ്ങളിലും പോലീസ് വിന്യാസം ശക്തമാക്കും. രണ്ടു ദിവസത്തേക്ക്‌ കൊണാട്ട് പ്ലേസിലെ സെൻട്രൽ പാർക്ക്‌ അടയ്‌ക്കാനും ന്യൂഡൽഹി മുനിസിപ്പൽ കോർപറേഷൻ തീരുമാനിച്ചു.
അതിനിടെ, സിജെപി പ്രതിഷേധം വിലക്കാൻ ഹൈക്കോടതി വിസമ്മതിച്ചു. പാലിക ബസാറിൽ കട നടത്തുന്ന അനിൽകുമാർ ഗുപ്‌തയാണ്‌ പ്രതിഷേധം വിലക്കണമെന്ന്‌ ആവശ്യപ്പെട്ട്‌ കോടതിയെ സമീപിച്ചത്‌.
SUMMARY: Gyanesh Kumar’s resignation; CJP’s Tiranga March today
