കൊച്ചി: രാജ്യത്തെ ഏറ്റവു വലിയ ഡാര്ക്ക് നെറ്റ് ലഹരി ശൃംഖല തകര്ത്ത് നാര്ക്കോട്ടിക് കണ്ട്രോള് ബ്യൂറോ. ശൃംഖല നിയന്ത്രിച്ചിരുന്ന മൂവാറ്റുപുഴ സ്വദേശി എഡിസനെ കൊച്ചി എന്സിബി യൂണിറ്റ് അറസ്റ്റ് ചെയ്തു. 35 ലക്ഷത്തിന്റെ രാസലഹരിക്ക് പുറമെ ലഹരിയിടപാടിലൂടെ സമ്പാദിച്ച എഴുപത് ലക്ഷത്തിന്റെ ക്രിപ്റ്റോ കറന്സിയുടെ വിവരങ്ങളും കണ്ടെത്തി. രണ്ടു വര്ഷമായി ഇയാള് ഡാര്ക്ക് വെബ് ഉപയോഗിച്ച് ലഹരി കച്ചവടം നടത്തുന്നുവെന്നാണ് വിവരം. എന്സിബിയുടെ കൊച്ചി യൂണിറ്റ് മെലണ് എന്ന പേരില് നടത്തിയ ഓപ്പറേഷനിലൂടെയാണ് കെറ്റാമെലോണ് എന്ന മയക്കുമരുന്ന് ശൃംഖല തകര്ത്തത്. ആറുമാസം നീണ്ട അന്വേഷണത്തിനു ശേഷമാണ് എന്സിബിക്ക് ലഹരി ശ്യംഖലയില് കടന്നു കയറാനായത്.
കേരളത്തിലേക്കെത്തുന്ന പോസ്റ്റല് പാഴ്സലുകളെ കേന്ദ്രീകരിച്ച് നടത്തിയ അന്വേഷണമാണ് വഴിത്തിരിവായത്. കഴിഞ്ഞ മാസം 28ന് കൊച്ചിയിലെത്തിയത് മൂന്ന് തപാല് പാഴ്സലുകള്. 280 എല്എസ്ഡി സ്റ്റാംപുകളാണ് ഈ പാഴ്സലുകളിലുണ്ടായിരുന്നത്. പാഴ്സല് വാങ്ങാനായി എത്തിയ എഡിസനെ കാത്തു നിന്ന എന്സിബി ഉദ്യോഗസ്ഥര് പിടികൂടി. ഇയാളുടെ വീട്ടില് നടത്തിയ പരിശോധനയില് 847 എൽഎസ്ഡി സ്റ്റാംപുകളും 131.66 ഗ്രാം കെറ്റാമൈനും പിടിച്ചെടുത്തു. ഇതിന്പുറമെ ഡാര്ക്നെറ്റ് മാര്ക്കറ്റുകളിലേക്ക് പ്രവേശിക്കാന് ഉപയോഗിച്ച ഒഎസ് അടങ്ങിയ പെൻ ഡ്രൈവ്, ക്രിപ്റ്റോ കറന്സി ഇടപാടുകളുടെ വിവരങ്ങളടങ്ങിയ ഹാര്ഡ് ഡ്രൈവുകളും വീട്ടില് നിന്ന് കണ്ടെത്തി.
ലെവല് ഫോര് എന്ന വിശേഷണത്തിലാണ് ഡാര്ക്ക് വെബിലെ ലഹരി ശൃംഖലയായ കെറ്റാമലോണ് പ്രവര്ത്തിച്ചിരുന്നത്. രാജ്യത്ത് വൻ ബന്ധങ്ങളുള്ള എഡിസന് കഴിഞ്ഞ രണ്ട് വര്ഷമായി സജീവമായി പ്രവര്ത്തിക്കുന്നുണ്ടെന്നും അന്വേഷണത്തിൽ വ്യക്തമായി. ബെംഗളൂരു, ചെന്നൈ, ഭോപ്പാല്, പട്ന, ഡല്ഹി, കൂടാതെ ഹിമാചല് പ്രദേശ്, ഉത്തരാഖണ്ഡ് എന്നിവിടങ്ങളിലെ പ്രധാന നഗരങ്ങളിലേക്ക് എല്എസ്ഡി ഇയാള് അയച്ചിട്ടുണ്ട്. 14 മാസത്തിനുള്ളില് 600-ല് അധികം പാര്സലുകളാണ് ഇയാള് നടത്തിയിരിക്കുന്നത്.
SUMMARY: India’s largest darknet drug ring busted; Malayali, main mastermind, arrested
