രാജ്ഗിര്‍(ബിഹാർ): ഏഷ്യാ കപ്പ് പുരുഷ ഹോക്കി കിരീടത്തില്‍ മുത്തമിട്ട് ഇന്ത്യ. ഫൈനലില്‍ നിലവിലെ ചാമ്പ്യന്മാരായ ദക്ഷിണ കൊറിയയെ 4–1ന് വീഴ്ത്തിയാണ് ഇന്ത്യയുടെ കിരീട നേട്ടം. ഏഷ്യാ കപ്പ് ജേതാക്കളായതോടെ അടുത്ത വർഷത്തെ ലോകകപ്പ് ഹോക്കിക്ക് ഇന്ത്യ യോഗ്യത നേടി. അടുത്തവർഷം ഓഗസ്റ്റ് 14 മുതൽ 30 വരെ ബൽജിയത്തിലും നെതർലൻഡ്സിലുമായാണ് പുരുഷ ഹോക്കി ലോകകപ്പ്. എട്ടു വർഷത്തിനു ശേഷമാണ് ഇന്ത്യ ഏഷ്യാ കപ്പ് ഹോക്കി ചാംപ്യന്മാരാകുന്നത്. ഇന്ത്യയുടെ നാലാം ഏഷ്യാ കപ്പ് കിരീടമാണിത്. 2003, 2007, 2017 എഡിഷനുകളിലായിരുന്നു ഇതിനു മുൻപ് ഇന്ത്യയുടെ കിരീടനേട്ടം
മത്സരത്തിന്റെ തുടക്കത്തിൽ തന്നെ ഇന്ത്യ ലീഡ് നേടി. സുഖ്ജീത് സിങ്ങാണ് ഇന്ത്യയ്ക്കായി വല കുലുക്കിയത്. ലീഡിന് പിന്നാലെ തകർത്ത് കളിച്ച ഇന്ത്യൻ താരങ്ങൾ പലതവണ ദക്ഷിണ കൊറിയന്‍ ഗോള്‍മുഖത്ത് ഇരച്ചെത്തി. രണ്ടാം ക്വാർട്ടറിൽ ദിൽപ്രീത് സിങ്ങിലൂടെ ഇന്ത്യ ലീഡ് രണ്ടാക്കി. രണ്ടാം പകുതിയിൽ ദിൽപ്രീത് സിങും അമിത് രോഹിദാസും ഇന്ത്യയ്ക്കായി ഗോൾ നേടി. മത്സരം അവസാനിക്കാൻ ഇരിക്കെയാണ് കൊറിയ ആശ്വാസ ഗോൾ നേടിയത്.
SUMMARY: India wins Asia Cup Hockey title: Direct qualification for World Cup
