പൂജാ അവധി; ഹുബ്ബള്ളിയില്‍ നിന്ന് ബെംഗളൂരു വഴി കൊല്ലത്തേക്ക് സ്പെഷ്യല്‍ ട്രെയിന്‍

ബെംഗളൂരു: പൂജാ അവധി, ശബരിമല തീർഥാടനം എന്നിവയുമായി ബന്ധപ്പെട്ട യാത്രാ തിരക്ക് പരിഗണിച്ച് ഹുബ്ബള്ളിയില്‍ നിന്ന് ബെംഗളൂരു വഴി കൊല്ലത്തേക്ക് സ്പെഷ്യല്‍ ട്രെയിന്‍ പ്രഖ്യാപിച്ച് ദക്ഷിണ പശ്ചിമ റെയില്‍വേ. എസ്.എസ്.എസ്. ഹുബ്ബള്ളിക്കും കൊല്ലത്തിനുമിടയിൽ 14 ട്രിപ്പുകളാണ് നടത്തുക.

ട്രെയിൻ നമ്പർ 07313 എസ്.എസ്.എസ്. ഹുബ്ബള്ളി – കൊല്ലം എക്സ്പ്രസ് സ്പെഷ്യൽ: 2025 സെപ്റ്റംബർ 28 മുതൽ 2025 ഡിസംബർ 28 വരെ എല്ലാ ഞായറാഴ്ചയും സർവീസ് നടത്തും, എസ്.എസ്.എസ്. ഹുബ്ബള്ളിയിൽ നിന്ന് ഉച്ചയ്ക്ക് 3:15 ന് പുറപ്പെട്ട് അടുത്ത ദിവസം ഉച്ചയ്ക്ക് 12:55 ന് കൊല്ലത്ത് എത്തിച്ചേരും. എസ്എംവിടി ബെംഗളൂരുവിലും കൃഷ്ണരാജപുരത്തും സ്റ്റോപ്പ് ഉണ്ട്. എസ്എംവിടി സ്റ്റേഷനിൽ രാത്രി 11 മണിക്ക് എത്തുന്ന ട്രെയിൻ 11.10 പുറപ്പെടും. കൃഷ്ണരാജപുരത്ത് നിന്ന് രാത്രി  11.25ന് പുറപ്പെടും.

ട്രെയിൻ നമ്പർ 07314 കൊല്ലം – എസ്.എസ്.എസ്. ഹുബ്ബള്ളി എക്സ്പ്രസ് സ്പെഷ്യൽ: 2025 സെപ്റ്റംബർ 29 മുതൽ 2025 ഡിസംബർ 29 വരെ എല്ലാ തിങ്കളാഴ്ചയും സർവീസ് നടത്തും, കൊല്ലത്ത് നിന്ന് വൈകുന്നേരം 5:00 ന് പുറപ്പെട്ട് അടുത്ത ദിവസം വൈകുന്നേരം 6:30 ന് എസ്.എസ്.എസ്. ഹുബ്ബള്ളിയിൽ എത്തിച്ചേരും.

01 എസി 2-ടയർ, 02 എസി 3-ടയർ, 12 സ്ലീപ്പർ ക്ലാസ്, 05 ജനറൽ സെക്കൻഡ് ക്ലാസ്, 02 സെക്കൻഡ് ക്ലാസ് ലഗേജ്-കം-ബ്രേക്ക് വാനുകൾ എന്നിവ ഉൾപ്പെടുന്ന 22 കോച്ചുകളാണ് ട്രെയിനിനുള്ളത്. ഹാവേരി, ദാവൻഗെരെ, ബീരൂർ, അർസികെരെ, തുമകുരു, ബംഗാരപേട്ട്, സേലം, ഈറോഡ്, തിരുപ്പൂർ, പോഡനൂർ, പാലക്കാട്, തൃശൂർ, ആലുവ, എറണാകുളം ടൗൺ, കോട്ടയം, ചങ്ങനാശ്ശേരി, തിരുവല്ല, ചെങ്ങന്നൂര്‍, മാവേലിക്കര, കായംകുളം, കരുനാഗപള്ളി, ശാസ്താംകോട്ട എന്നിവിടങ്ങളിലാണ് ഇരുവശങ്ങളിലുമുള്ള മറ്റു സ്റ്റോപ്പുകള്‍.
SUMMARY: Special train from Hubballi to Kollam via Bengaluru