തിരുവനന്തപുരം: മകന് വിവേക് കിരണിനെതിരെ ഇഡി സമന്സയച്ചുവെന്ന വിവാദത്തില് പ്രതികരിച്ച് മുഖ്യമന്ത്രി പിണറായി വിജയന്. തനിക്കോ മകനോ ഇഡി സമന്സ് ലഭിച്ചിട്ടില്ലെന്ന് മുഖ്യമന്ത്രി പത്രസമ്മേളനത്തില് പറഞ്ഞു. അധികാരത്തിന്റെ ഇടനാഴിയില് തന്റെ മകനെ നിങ്ങള്ക്ക് കാണാനാകില്ലെന്നും മക്കളില് അഭിമാനമാണെന്നും മുഖ്യമന്ത്രി പറഞ്ഞു. മകള്ക്ക് നേരെ പലതും ഉയര്ത്തിക്കൊണ്ടുവന്നപ്പോള് അത് ഏശുന്നില്ലെന്ന് വന്നപ്പോള് മര്യാദയ്ക്ക് ജോലി എടുത്ത് കഴിയുന്ന ഒരാളെ വിവാദത്തില് ഉള്പ്പെടുത്താന് നോക്കുകയാണെന്നും മുഖ്യമന്ത്രി പറഞ്ഞു.
‘എന്റെ കൈയ്യില് ഇഡി സമന്സ് കിട്ടിയിട്ടില്ല. മകന് ഇങ്ങനെയൈാരു സംഭവം നടന്നതായി പറഞ്ഞിട്ടില്ല. തെരഞ്ഞെടുപ്പ് അടുത്തല്ലോ, കുറച്ചു നാള് മുമ്പ് ഒരാള് എന്നോട് പറഞ്ഞു ഒരു വലിയ ബോംബ് വരാന് പോകുന്നുണ്ടെന്ന് എന്നാല് ഇതൊരു നനഞ്ഞ പടക്കമായി പോയി. തെറ്റായ ചിത്രം വരച്ച് എന്നെ മറ്റൊരു തരത്തില് കാണിക്കണം. ഇങ്ങനെ ചിത്രീകരിക്കാന് നോക്കിയാല് ഞാന് കളങ്കിതനാകില്ലെന്നും’ മുഖ്യമന്ത്രി പറഞ്ഞു.
തന്റെ രണ്ട് മക്കളിലും അഭിമാനമാണുള്ളത്. ജോലി, വീട് എന്ന രീതിയില് മാത്രം ജീവിക്കുന്നയാളാണ് മകന്. ഇ ഡി സമന്സ് ആര്ക്കാണ് അയച്ചത്? ആരുടെ കയ്യിലാണ് സമന്സ് കൊടുത്തത്? ഒരു സമന്സും ക്ലിഫ് ഹൗസില് വന്നില്ല. വിവേക് അത്തരമൊരു കാര്യം പറഞ്ഞിട്ടുമില്ല. മകള്ക്ക് നേരെ പലരും ഉയര്ത്തിക്കൊണ്ടുവന്നപ്പോള് അത് ഏശുന്നില്ലെന്ന് വന്നപ്പോള് മര്യാദയ്ക്ക് ജോലി എടുത്ത് കഴിയുന്ന ഒരാളെ വിവാദത്തില് ഉള്പ്പെടുത്താന് നോക്കുന്നു. ഈ വിവാദങ്ങളൊന്നും തന്നെയോ മകനെയോ ബാധിക്കില്ലെന്നും മുഖ്യമന്ത്രി പറഞ്ഞു.
ശബരിമല സ്വര്ണക്കൊള്ളയില് പ്രത്യേക അന്വേഷണ സംഘത്തിന്റെ അന്വേഷണം പൂര്ത്തിയാക്കിയ ശേഷം തുടര് നടപടികള് സ്വീകരിക്കുമെന്നും മുഖ്യമന്ത്രി പറഞ്ഞു. അന്വേഷണം അവസാനിക്കും മുന്പ് വിധിയെഴുതേണ്ട കാര്യമില്ലല്ലോ, അന്വേഷണത്തെ ഏതെങ്കിലും വിധത്തില് ബാധിക്കുന്ന ഒരു പരാമര്ശവും തന്റെ ഭാഗത്ത് നിന്നുണ്ടാവില്ലെന്നും മുഖ്യന്ത്രി പറഞ്ഞു. ആരൊക്കെ ജയിലില് പോകുമെന്ന കാര്യം അന്വേഷണത്തിന് ശേഷം കണ്ടറിയാമെന്നും മുഖ്യമന്ത്രി പറഞ്ഞു.
SUMMARY: ‘No ED summons received; children have not given a bad name’: Chief Minister Pinarayi Vijayan
