പാലക്കാട്: ആർ.എസ്.എസ് നേതാവ് ശ്രീനിവാസൻ വധക്കേസുമായി ബന്ധപ്പെട്ട് ഒളിവിലായിരുന്ന ഒരാളെക്കൂടി ദേശീയ അന്വേഷണ ഏജൻസി (എൻ.ഐ.എ.) അറസ്റ്റ് ചെയ്തു. കേസിലെ 55-ാം പ്രതിയായ ഷാഹുൽ ഹമീദിനെയാണ് ഇന്റർപോളിന്റെ സഹായത്തോടെ എൻ.ഐ.എ പിടികൂടിയത്.കൊലപാതകത്തിന് ശേഷം ഒമാനിലേക്ക് കടന്ന ഇയാൾക്കെതിരെ നേരത്തെ ലുക്ക്ഔട്ട് നോട്ടീസ് പുറപ്പെടുവിച്ചിരുന്നു. ഗൂഢാലോചന, പ്രതികളെ ഒളിവിൽ താമസിപ്പിക്കൽ തുടങ്ങിയ ഗുരുതരമായ കുറ്റങ്ങളാണ് ഷാഹുൽ ഹമീദിനെതിരെ ചുമത്തിയിട്ടുള്ളത്. ഇയാളെ ഒമാനിൽ നിന്ന് ഡൽഹിയിലെത്തിച്ച ശേഷം കൊച്ചി എൻ.ഐ.എ കോടതിയിൽ ഹാജരാക്കി.
2022 ഏപ്രിൽ 16-നാണ് ആർ.എസ്.എസ് പ്രവർത്തകനായ ശ്രീനിവാസൻ കൊല്ലപ്പെടുന്നത്. പോപ്പുലർ ഫ്രണ്ട് നേതാവ് സുബൈറിനെ കൊലപ്പെടുത്തിയതിനുള്ള പ്രതികാരമായാണ് തൊട്ടടുത്ത ദിവസം ശ്രീനിവാസനെ കൊലപ്പെടുത്തിയത് എന്ന് പോലീസ് കണ്ടെത്തിയിരുന്നു. ഈ കേസിൽ മൊത്തം 71 പ്രതികളാണ് ഉള്ളത്. നിലവിലെ അറസ്റ്റോടെ കേസിൽ ഇനി ഏഴ് പ്രതികളെക്കൂടി കണ്ടെത്താനുണ്ട്. എൻ.ഐ.എ കേസ് ഏറ്റെടുക്കുന്നതിന് മുൻപ് ചില പ്രതികൾക്ക് ഹൈക്കോടതിയും സുപ്രീം കോടതിയും ജാമ്യം അനുവദിച്ചിരുന്നു.
SUMMARY: Palakkad Sreenivasan murder case: One more accused arrested
