നടി നവ്യ നായരുടെ ഭര്‍തൃമാതാവ് അന്തരിച്ചു

കൊച്ചി: നടി നവ്യ നായരുടെ ഭര്‍തൃമാതാവ് അന്തരിച്ചു. ഭര്‍ത്താവ് സന്തോഷ് മേനോന്‍ തന്റെ സോഷ്യല്‍ മീഡിയ പോസ്റ്റിലൂടെയാണ് ഇക്കാര്യം അറിയിച്ചത്. ജീവിതത്തില്‍ എന്നും തണലായി നിന്ന പ്രിയപ്പെട്ട അമ്മായിയമ്മയുടെ വിയോഗത്തില്‍ ഹൃദയസ്പർശിയായ കുറിപ്പുമായി നടി നവ്യ നായർ. ‘അങ്ങനെ ആ വിളക്ക് അണഞ്ഞു’ എന്നാണ് വേദനയോടെ നവ്യ കുറിച്ചത്.

“അങ്ങനെ ആ വിളക്ക് അണഞ്ഞു.
എന്നും ഏതിനും ധൈര്യമായിരുന്നു, മരുമകളായിട്ടല്ല മകളായി സ്നേഹിച്ചു, എല്ലാ സങ്കടങ്ങളിലും മക്കള് വിഷമിക്കണ്ട അമ്മേടെ പ്രാർഥനയും അനുഗ്രഹവും കൂടെ ഉണ്ടാവും എന്ന് പറഞ്ഞു കൂടെ നിർത്തി. അമ്മ ആഗ്രഹിച്ചത് പോലെ ഇതുവരെ എല്ലാം ചെയ്തു. അമ്മേടെ സ്നേഹത്തിന് മുന്നില്‍ എന്റെ നഷ്ടങ്ങള്‍ ഞാൻ സഹിച്ചു.

എന്റെ നൃത്തം ഏറെ ഇഷ്ടപെട്ട അമ്മ, അവസാനമായി മാതംഗി ഫെസ്റ്റിവലില്‍ വന്നു, എന്റെ കച്ചേരി മുഴുവൻ കണ്ടു. രണ്ട് മണിക്കൂർ നൃത്തം ചെയ്തു എന്ന് അഭിമാനത്തോടെ എല്ലാരോടും പറഞ്ഞു. ‘മക്കളേ.. ‘ ആ വിളി കാതുകളില്‍ മുഴങ്ങി നില്‍ക്കുന്നു.. ‘മക്കടെ വിളക്ക് ഒരുകാലത്തും കെടില്ല, അമ്മയാ പറയുന്നേ ‘
നിത്യ ശാന്തി നേരുന്നു,” നവ്യ കുറിച്ചു. 2010 ല്‍ ആയിരുന്നു നവ്യ നായരുടെയും സന്തോഷ് മേനോന്റെയും വിവാഹം.

SUMMARY: Actress Navya Nair’s mother-in-law passes away