ബെംഗളൂരു: ബെംഗളൂരുവില് നിന്ന് വിജയപുരയിലേക്ക് പുതിയ ദ്വൈവാര എക്സ്പ്രസ് സ്പെഷ്യല് ട്രെയിന് സര്വീസ് പ്രഖ്യാപിച്ച് ദക്ഷിണ പശ്ചിമ റെയില്വേ. രണ്ട് മാസം മുമ്പ് കമ്മീഷന് ചെയ്ത ആലമാറ്റിക്കും വാണ്ടലിനും ഇടയിലുള്ള 9.6 കിലോമീറ്റര് പാത ഇരട്ടിപ്പിക്കല് പൂര്ത്തിയായതിനെ തുടര്ന്നാണ് പുതിയ ട്രെയിനിന്റെ വരവ്. ആഴ്ചയില് രണ്ട് തവണയാണ് സര്വീസ്. ജൂണ് ഒന്ന് മുതല് സര്വീസ് ആരംഭിക്കും.
വൈകിട്ട് 6.15ന് ബെംഗളൂരു യശ്വവന്ത്പൂരില് നിന്ന് യാത്ര പുറപ്പെടുന്ന ട്രെയിന് (06577) പിറ്റേദിവസം പുലര്ച്ചെ 5.15ന് വിജയപുരയില് എത്തിച്ചേരും. ഞായറാഴ്ചകളിലും ചൊവ്വാഴ്ചകളിലുമാണ് ട്രെയിനിന്റെ മടക്കയാത്ര(06578) . വൈകുന്നേരം 5 മണിക്ക് വിജയപുരയില് നിന്ന് ആരംഭിച്ച് അടുത്ത ദിവസം പുലര്ച്ച് 4.10ന് ട്രെയിന് യശ്വന്ത്പൂരില് എത്തിച്ചേരുന്നതാണ്.
19 കോച്ചുകളുള്ള ട്രെയിനിന് തുംകുരു, അര്സിക്കെരെ, ദാവന്ഗരെ, ഹാവേരി, ഗദഗ് ബൈപാസ്, ബദാമി, ബാഗല്കോട്ട്, ആലമാട്ടി, ബസവന ബാഗേവാടി എന്നിവിടങ്ങളിലാണ് സ്റ്റോപ്പുകള്.
ഈ റൂട്ടില് സര്വീസ് നടത്തുന്ന മറ്റ് ട്രെയിനുകള്ക്ക് യാത്ര പൂര്ത്തിയാക്കാന് ഏകദേശം 15 മണിക്കൂര് സമയം വേണം. എന്നാല് പുതിയ ട്രെയിനിന് വെറും 11 മണിക്കൂര് മാത്രമേ വേണ്ടിവരൂ. ഹുബ്ബള്ളി, ഗഡാഗ് എന്നീ സ്റ്റേഷനുകള് ഒഴിവാക്കി സര്വീസ് നടത്തുന്നതാണ് യാത്രാ സമയം കുറയ്ക്കാന് സഹായിക്കുന്നത്.
SUMMARY: Bengaluru-Vijayapura train journey now only 11 hours; new train from tomorrow
