പാര്‍ക്ക് ചെയ്തിരുന്ന ലോറിയില്‍ തീപിടിത്തം

തിരുവനന്തപുരം: പാർക്കിംഗ് ഏരിയയില്‍ കിടന്ന ലോറിയില്‍ തീപിടിത്തം. വിഴിഞ്ഞം ബസ് സ്റ്റാന്ഡിന് സമീപം പാർക്ക് ചെയ്തിരുന്ന ലോറിക്കാണ് തീപിടിച്ചത്. ലോറിയുടെ പിൻഭാഗത്തുനിന്നും പുക ഉയരുന്നത് കണ്ടവരാണ് വിവരം അഗ്നിരക്ഷാസേനയെ അറിയിച്ചത്.
വിഴിഞ്ഞത്തുനിന്നും രണ്ട് യൂണിറ്റ് സേനാംഗങ്ങളെത്തിയാണ് വാഹനത്തിലെ തീ അണച്ചത്.

വിഴിഞ്ഞം സ്വദേശിയുടെ മത്സ്യം കൊണ്ടുപോകുന്ന ലോറിയാണ് തീപിടിത്തത്തില്‍ കത്തിനശിച്ചത്. സീസണ്‍ അല്ലാതിരുന്നതിനാല്‍ പാർക്ക് ചെയ്തിരിക്കുകയായിരുന്ന വാഹനത്തിന്റെ പിൻഭാഗമാണ് കത്തി നശിച്ചത്. സമീപത്ത് മറ്റൊരു ലോറി ഉണ്ടായിരുന്നെങ്കിലും തീപടരും മുമ്പെ അഗ്നിരക്ഷസേന എത്തിയതിനാല്‍ വൻ അപകടമാണ് ഒഴിവായത്.

ലോറിയുടെ പുറക് വശത്ത് കൂട്ടിയിട്ടിരുന്ന ചപ്പ് ചവറുകളില്‍ നിന്നാണ് തീ പടർന്നതെന്ന് അഗ്നിരക്ഷ സേനാംഗങ്ങള്‍ പറഞ്ഞു. പിൻഭാഗത്തെ ടയറുകള്‍ കത്തിയാണ് വാഹനത്തിന്റെ യന്ത്രഭാഗങ്ങളിലേക്ക് തീപടർന്നത്. രണ്ട് ലക്ഷം രൂപയുടെ നഷ്ടം കണക്കാക്കുന്നെന്നും ഉദ്യോഗസ്ഥർ പറഞ്ഞു.

SUMMARY: Fire breaks out in parked lorry