ന്യൂഡൽഹി: ഹൂതി ആക്രമണങ്ങള്‍ വ്യോമപാതയ്ക്ക് ഭീഷണിയാകുന്ന തരത്തിലുള്ള സമീപകാല ആക്രമണങ്ങളുടെയും നിലവിലുള്ള സംഘർഷാവസ്ഥയുടെയും പശ്ചാത്തലത്തിൽ ഇൻഡിഗോ, ആകാസ എയർ, എയർ ഇന്ത്യ തുടങ്ങിയ ഇന്ത്യൻ വിമാനക്കമ്പനികൾ സൗദി അറേബ്യയിലെ വിവിധ നഗരങ്ങളിലേക്കും തിരിച്ചുമുള്ള വിമാന സർവീസുകൾ 2026 ഒക്ടോബർ 17 (ശനിയാഴ്‌ച) വരെ നിർത്തിവച്ചു.
സൗദി അറേബ്യയിലെ മാറിക്കൊണ്ടിരിക്കുന്ന സാഹചര്യം കണക്കിലെടുത്ത് റിയാദ്, ജിദ്ദ, ദമ്മാം, മദീന എന്നിവിടങ്ങളിലേക്കും തിരിച്ചുമുള്ള വിമാനങ്ങൾ ശനിയാഴ്‌ച വരെ റദ്ദാക്കിയതായി ഇൻഡിഗോ ട്വിറ്ററിൽ നൽകിയ യാത്രാ മുന്നറിയിപ്പിൽ വ്യക്തമാക്കി. യാത്രക്കാരുടെ സുരക്ഷയ്ക്കും ക്ഷേമത്തിനുമാണ് മുൻഗണന നൽകുന്നതെന്ന് വ്യക്തമാക്കിയ കമ്പനി, വിമാനങ്ങളുടെ നിലവിലെ സ്ഥിതി അറിയാൻ ഔദ്യോഗിക വെബ്സൈറ്റ് പരിശോധിക്കാനും യാത്രക്കാരോട് നിർദ്ദേശിച്ചു.
ദമാം, ജിദ്ദ, റിയാദ് എന്നിവിടങ്ങളിലേക്കും തിരിച്ചുമുള്ള സർവിസുകൾ റദ്ദാക്കിയതായി എയർ ഇന്ത്യ എക്സ്പ്രസ് വ്യക്തമാക്കി. യാത്രക്കാർക്ക് അധിക നിരക്കില്ലാതെ യാത്ര തീയതി മാറ്റുകയോ ടിക്കറ്റ് റദ്ദാക്കി മുഴുവൻ തുകയും തിരികെ നേടുകയോ ചെയ്യാമെന്ന് കമ്പനി അറിയിച്ചു. റിയാദ്, ദമ്മാം, ജിദ്ദ എന്നിവിടങ്ങളിലേക്കുള്ള സർവിസുകൾ റദ്ദാക്കിയതായി എയർ ഇന്ത്യ അറിയിച്ചു. യാത്രക്കാർക്ക് ടിക്കറ്റ് റദ്ദാക്കുമ്പോൾ മുഴുവൻ തുകയും തിരികെ നൽകും. റിയാദ്, ജിദ്ദ എന്നിവിടങ്ങളിലേക്കും തിരിച്ചുമുള്ള സർവിസുകൾ നിർത്തിവെക്കുന്നതായി ആകാശ എയറും അറിയിച്ചു.
സർവീസുകളിൽ പെട്ടെന്നുണ്ടായ ഈ മാറ്റങ്ങൾ കാരണം ആയിരക്കണക്കിന് പ്രവാസികളും ഉംറ തീർത്ഥാടകരുമാണ് വലയുന്നത്. യാത്രക്കാർ വിമാനത്താവളത്തിലേക്ക് തിരിക്കുന്നതിന് മുൻപ് അതത് എയർലൈനുകളുമായി ബന്ധപ്പെട്ട് സമയവിവരങ്ങൾ ഉറപ്പുവരുത്തണമെന്ന് അധികൃതർ നിർദ്ദേശിക്കുന്നു.
SUMMARY: Indian airlines cancel Saudi services until the 17th; travel crisis worsens.
SUMMARY: Indian airlines cancel Saudi services until the 17th; travel crisis worsens.
