മനാമ: ഇസ്രയേലിനൊപ്പം അമേരിക്കയും ആക്രമിച്ചതോടെ ഖത്തറിലെ യുഎസ് വ്യോമതാവളങ്ങള്‍ക്കുനേരെ പ്രത്യാക്രമണം നടത്തി ഇറാന്‍. ഖത്തര്‍ പ്രാദേശിക സമയം തിങ്കള്‍ വൈകിട്ട് 7.30ഓടെയാണ് ദോഹയ്ക്കടുത്ത് അല്‍ ഉദൈദ് വ്യോമതാവളത്തെ ലക്ഷ്യമിട്ട് മിസൈല്‍ ആക്രമണം. ഇറാന്റെ മിസൈലുകളെ ആകാശത്ത് തന്നെ പ്രതിരോധിച്ചതായാണ് വിവരം. ജനവാസ മേഖലയില്‍ മിസൈലുകള്‍ വീണതായി റിപോര്‍ട്ടില്ല. ആക്രമണത്തില്‍ ആര്‍ക്കും പരുക്കില്ലെന്ന് ഖത്വര്‍ അറിയിച്ചു. ഖത്തറില്‍ ഉണ്ടായതിനേക്കാള്‍ ശക്തമായ ആക്രമണമാണ് ഇറാഖില്‍ നടന്നതെന്നാണ് റിപോര്‍ട്ട്.
മിസൈലുകള്‍ അന്തരീക്ഷത്തില്‍വച്ച് തടയുന്നതിന്റെ വീഡിയോകള്‍ സമൂഹമാധ്യമങ്ങളില്‍ പലരും പങ്കുവച്ചു. ഖത്തറിലെ യുഎസ് വ്യോമതാവളം ആക്രമിച്ചതായി ഇറാന്‍ സൈന്യം സ്ഥിരീകരിച്ചു. ബഷാറത്ത് ഫത്ത എന്ന് പേരിട്ട ദൗത്യം ഗള്‍ഫ് രാജ്യങ്ങളെ ലക്ഷ്യമിട്ടല്ലെന്നും പ്രസ്താവനയില്‍ അറിയിച്ചു. ഇറാഖിലെ അമേരിക്കന്‍ വ്യോമതാവളങ്ങളെയും ഇറാന്‍ ലക്ഷ്യമിട്ടതായി യുകെയിലെ സ്‌കൈ ന്യൂസ് റിപ്പോര്‍ട്ട് ചെയ്തു. ഖത്തര്‍ വ്യോമാതിര്‍ത്തി അടച്ചുപൂട്ടിയതിനു പിന്നാലെയാണ് ഇറാന്‍ മിസൈല്‍ ആക്രമണം. ബഹ്റൈനും യുഎഇയും വ്യോമാതിര്‍ത്തി അടച്ചു. അമേരിക്കയുടെയും ബ്രിട്ടന്റെയും ഇന്ത്യയുടെയും എംബസികള്‍ തങ്ങളുടെ പൗരരോട് ജാഗ്രത പുലര്‍ത്താന്‍ നിര്‍ദേശിച്ചിട്ടുണ്ട്. ആക്രമണത്തെ ഖത്തര്‍ അപലപിച്ചു.
അതേസമയം ആക്രമണം ‘സഹോദര രാജ്യമായ’ ഖത്തറിനെതിരല്ലെന്ന് ഇറാന്‍ പരമോന്നത ദേശീയ സുരക്ഷാ സമിതി പ്രസ്താവനയില്‍ പ്രതികരിച്ചു. ഖസംഘര്‍ഷത്തില്‍ യു എസ് പങ്കാളിയായാല്‍ പശ്ചിമേഷ്യന്‍ രാജ്യങ്ങളിലെ യു എസ് വ്യോമതാവളങ്ങളില്‍ ആക്രമണം നടത്തുമെന്ന് ഇറാന്‍ നേരത്തേ വ്യക്തമാക്കിയിരുന്നു.
SUMMARY: Iran fires missiles at US base; attacks on Qatar and Iraq
