ആര്‍എസ്എസ് റൂട്ട് മാര്‍ച്ചിന് അനുമതി നിഷേധിച്ച് കര്‍ണാടക സര്‍ക്കാര്‍

ബെംഗളൂരു: മന്ത്രി പ്രിയങ്ക് ഖാര്‍ഗെയുടെ സ്വന്തം നാടായ ചിറ്റാപ്പൂരില്‍ ഇന്ന് നടത്താനിരുന്ന ആര്‍എസ്എസ് റൂട്ട് മാര്‍ച്ചിന് അനുമതി നിഷേധിച്ച് കര്‍ണാടക സര്‍ക്കാര്‍. തഹസില്‍ദാര്‍ നാഗയ്യ ഹിരേമാണ് ഇതുസംബന്ധിച്ച് ഉത്തരവിട്ടത്.
ഞായറാഴ്ച ചിറ്റാപൂര്‍ പട്ടണത്തില്‍ റോഡ് ഷോ നടത്താന്‍ ഭീം ആര്‍മിയും ദളിത് പാന്തേഴ്സും അനുമതി തേടിയിട്ടുണ്ടെന്നും ക്രമസമാധാന നില തകരാന്‍ സാധ്യതയുണ്ടെന്നും അനുമതിക്കായി അപേക്ഷിച്ച ആര്‍എസ്എസ് നേതാവ് പ്രഹ്ലാദ് വിശ്വകര്‍മയ്ക്ക് എഴുതിയ കത്തില്‍ അദ്ദേഹം പറഞ്ഞു. അനുമതി നല്‍കരുതെന്ന് പോലീസ് ഉദ്യോഗസ്ഥര്‍ റിപ്പോര്‍ട്ട് ചെയ്തിട്ടുണ്ടെന്നും അദ്ദേഹം ഉത്തരവില്‍ സൂചിപ്പിച്ചു. അനിഷ്ട സംഭവങ്ങളും സമാധാനവും ക്രമസമാധാനവും തകര്‍ക്കുന്നതും തടയുന്നതിനാണ് തീരുമാനമെടുത്തതെന്നും അദ്ദേഹം പറഞ്ഞു.

റൂട്ട് മാര്‍ച്ചിനായി ആര്‍എസ്എസ് പ്രവര്‍ത്തകര്‍ വിപുലമായ ഒരുക്കങ്ങള്‍ നടത്തിയിരുന്നു. ചിറ്റാപൂര്‍ പട്ടണത്തില്‍ ഭഗവദ്വജ്, ബാനറുകള്‍, ബണ്ടിംഗുകള്‍ എന്നിവ സ്ഥാപിച്ചിരുന്നു. എന്നാല്‍, സ്ഥാപിക്കുന്നതിന് സംഘടനയ്ക്ക് ശരിയായ അനുമതി ലഭിച്ചിട്ടില്ലെന്ന് ചൂണ്ടിക്കാട്ടി ശനിയാഴ്ച പുലര്‍ച്ചെ മുനിസിപ്പല്‍ അധികൃതര്‍ അവ നീക്കം ചെയ്തിരുന്നു. മന്ത്രി തന്റെ സ്വന്തം നിയമസഭാ മണ്ഡലമായ ‘റിപ്പബ്ലിക് ഓഫ് ചിറ്റാപൂര്‍’ ആക്കാന്‍ ശ്രമിക്കുന്നുവെന്ന് ആരോപിച്ച് ബിജെപി നേതാക്കളില്‍ നിന്ന് ഇത് രൂക്ഷമായ വിമര്‍ശനത്തിന് ഇടയാക്കി.
SUMMARY: Karnataka government denies permission for RSS route march