കാട്ടാന ശല്യത്തിനു ശാശ്വത പരിഹാരം : ഐഐഎസ്സിയുമായി ധാരണാപത്രം ഒപ്പുവച്ച് കർണാടക സർക്കാർ

ബെംഗളൂരു: കാട്ടാന ആക്രമണത്തിനു ശാശ്വത പരിഹാരം കാണാൻ ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസസുമായി(ഐഐഎസ്സി) ധാരണാപത്രം ഒപ്പുവച്ച് കർണാടക സർക്കാർ. സ്വാഭാവിക ആവാസ വ്യവസ്ഥകളും ആനത്താരകളും സംരക്ഷിക്കുന്നതിലൂടെ ആനകൾ നാട്ടിലിറങ്ങുന്നത് തടയാനാണ് ലക്ഷ്യമിടുന്നത്.

ഇതിനായി ഉപഗ്രഹസംവിധാനങ്ങളും ക്യാമറകളും സ്ഥാപിച്ച് ആനകളെ നിരന്തരം നിരീക്ഷിക്കും. ഇവയുടെ പിണ്ടം പരിശോധിച്ച് ഹോർമോൺ അളവുകളിലെ വ്യതിയാനങ്ങളും വിലയിരുത്തും. ആനകൾ ജനവാസ കേന്ദ്രത്തിലെത്തുന്നതിനു മുന്നോടിയായി മുന്നറിയിപ്പ് നൽകുന്ന സംവിധാനം വികസിപ്പിക്കാനും പദ്ധതിയിലൂടെ ലക്ഷ്യമിടുന്നു.

4.74 കോടി രൂപയുടെ പദ്ധതിക്കായി 5 വർഷത്തെ കരാറാണ് ഒപ്പുവച്ചത്. സംസ്ഥാനത്ത് 6395 കാട്ടാനകളുണ്ടെന്നാണ് കണക്ക്. ഹാസൻ, കുടക് മേഖലയിൽ ഉൾപ്പെടെ കാട്ടാന ശല്യം രൂക്ഷമാണ്.

SUMMARY: Karnataka govt signs MoU with IISC to curb human-elephant conflict.