നമ്മ മെട്രോ: പ്രതിദിന യാത്രക്കാരുടെ എണ്ണത്തിൽ നേരിയ ഇടിവ്

ബെംഗളൂരു: നമ്മ മെട്രോ പ്രതിദിന യാത്രക്കാരുടെ എണ്ണത്തിൽ മേയ് മാസത്തിൽ നേരിയ ഇടിവ്. മേയിൽ പ്രതിദിനം ശരാശരി 7.56 ലക്ഷം പേരാണ് നമ്മ മെട്രോ ഉപയോഗിച്ചത്. ഏപ്രിലിൽ ഇതു 7.62 ലക്ഷമായിരുന്നു. ഫെബ്രുവരി 9ന് ടിക്കറ്റ് നിരക്കിൽ 45% വർധന വരുത്തിയതോടെ യാത്രക്കാരുടെ എണ്ണം കുറഞ്ഞിരുന്നു.

കഴിഞ്ഞ ജനുവരിയിൽ 8.03 ലക്ഷം പ്രതിദിന യാത്രക്കാരാണ് നമ്മ മെട്രോയ്ക്കുണ്ടായിരുന്നത്. നിരക്ക് വർധന പ്രാബല്യത്തിൽ വന്നതോടെ ഫെബ്രുവരിയിൽ ഇതു 7.49 ലക്ഷമായി കുറഞ്ഞു. മാർച്ചിൽ 7.24 ലക്ഷമായി. എന്നാൽ ജൂൺ മാസം ആരംഭിച്ചതു മുതൽ യാത്രക്കാരുടെ എണ്ണം വർധിച്ചതായി ബിഎംആർസി അറിയിക്കുന്നു. ഭൂരിഭാഗം ദിവസങ്ങളിലും 8 ലക്ഷത്തിലേറെ പേർ മെട്രോ ഉപയോഗിക്കുന്നു. ജൂണിലെ കണക്കുകൾ ജനുവരിയിലെ 8.03 ലക്ഷം മറികടക്കുമെന്നാണ് ബിഎംആർസിയുടെ പ്രതീക്ഷ.

ഇലക്ട്രോണിക് സിറ്റിയിലേക്കുള്ള ആർവി റോഡ്-ബൊമ്മസന്ദ്ര പാത തുറക്കുന്നതോടെ പ്രതിദിന യാത്രക്കാരുടെ എണ്ണം 10 ലക്ഷം കടക്കുമെന്നും വിലയിരുത്തുന്നു.

Summary: Namma Metro ridership dropped marginally in May