ബെംഗളൂരു നഗരത്തിൽ നിന്ന് വിമാനത്താവളത്തിലേക്ക് ട്രെയിൻ സർവീസ് ആരംഭിക്കുമെന്ന് കേന്ദ്ര റെയിൽവേ മന്ത്രി

ബെംഗളൂരു: ബെംഗളൂരു നഗരത്തിൽ നിന്ന് കെംപെഗൗഡ രാജ്യാന്തര വിമാനത്താവളത്തിലേക്ക് ട്രെയിൻ സർവീസ് ആരംഭിക്കുമെന്ന് കേന്ദ്ര റെയിൽവേ മന്ത്രി അശ്വിനി വൈഷ്ണവ്. സംസ്ഥാന സർക്കാർ നൽകുന്ന റോഡ്, മെട്രോ റെയിൽ, സബർബൻ റെയിൽവേ സേവനങ്ങൾക്ക് പുറമെ കെംപഗൗഡ വിമാനത്താവളത്തിൽ നിന്ന് ട്രെയിൻ യാത്രാ ഓപ്ഷൻ റെയിൽവേ മന്ത്രാലയം അവതരിപ്പിക്കുമെന്ന് മന്ത്രി അറിയിച്ചു. പദ്ധതി നടപ്പാക്കുന്നതിനു മുമ്പ് ചില സാങ്കേതിക വെല്ലുവിളികൾ പരിഹരിക്കേണ്ടതുണ്ടെന്നും അതിനുള്ള ശ്രമത്തിലാണ് റെയിൽവേ എന്നും അദ്ദേഹം വിശദമാക്കി.

മെട്രോ റെയിൽ, റോഡ്, റെയിൽ ഇൻഫ്രാസ്ട്രക്ചർ ഡെവലപ്‌മെന്‍റ് കമ്പനി (കെ-റൈഡ്) നിയന്ത്രിക്കുന്ന സബർബൻ റെയിൽവേ പ്രോജക്റ്റ് എന്നിവ വഴി ജനങ്ങൾക്ക് നിലവിൽ ബെംഗളൂരു വിമാനത്താവളത്തിലേക്ക് എത്താൻ സാധിക്കും. ഇവ കൂടാതെ വിമാനത്താവളത്തിലേക്ക് റെയിൽവേ കണക്റ്റിവിറ്റി ഓപ്ഷനും നൽകാനാണ് തീരുമാനമെന്ന് അദ്ദേഹം പറഞ്ഞു. ദൊഡ്ഡജാലയ്ക്കും കെംപഗൗഡ അന്താരാഷ്ട്ര വിമാനത്താവളത്തിനും ഇടയിലുള്ള പുതിയ റെയിൽവേ ലിങ്ക് പാതയ്ക്ക് ആകെ 7.9 കിലോമീറ്റർ നീളമുണ്ടാകും. മൂന്ന് സ്റ്റേഷനുകളും ഉണ്ടായിരിക്കും. 7.9 കിലോമീറ്റർ ദൂരത്തിൽ 6.25 കിലോമീറ്റർ എലവേറ്റഡ് പാതയും ബാക്കി 1.65 കിലോമീറ്റർ ഭൂഗർഭ പാതയും ആയിരിക്കും.

TAGS: BENGALURU
SUMMARY: Train connectivity from Bengaluru city to Airport soon, says Vaishnaw