ബെംഗളൂരു: ബെംഗളൂരു സൗത്ത് ജില്ലയിലെ മാഗഡി താലൂക്കിലുള്ള കല്ലുദേവനഹള്ളി ഗ്രാമത്തിൽ പുള്ളിപ്പുലിയുടെ ആക്രമണത്തില്‍ ക്ഷേത്രപൂജാരി മരിച്ചു. മഹാദേശ്വര സ്വാമി ക്ഷേത്ര പൂജാരിയായ ശിവസ്വാമിയെയാണ് തിങ്കളാഴ്ച രാവിലെ കൃഷിയിടത്തിൽ മരിച്ച നിലയിൽ കണ്ടെത്തിയത്
തിങ്കളാഴ്ച പുലർച്ചെ 5.45ഓടെ ക്ഷേത്രത്തിൽ പൂജയ്ക്കാവശ്യമായ പൂക്കൾ ശേഖരിക്കാൻ വീട്ടിൽനിന്ന് ഇറങ്ങിയതായിരുന്നു ശിവസ്വാമി. വീടിന് ഏകദേശം 400 മീറ്റർ അകലെയുള്ള കൃഷിയിടത്തിലേക്കാണ് അദ്ദേഹം പോയത്. രാവിലെ ഏഴുമണിയോടെ അതുവഴി വന്ന പാൽവിതരണക്കാരനാണ് രക്തത്തിൽ കുളിച്ച നിലയിൽ അദ്ദേഹത്തെ കണ്ടത്. തുടർന്ന് ഗ്രാമവാസികളെ വിവരമറിയിക്കുകയായിരുന്നു.
ശിവസ്വാമിയുടെ കഴുത്തിലും വയറിന്റെ ഭാഗത്തും മുറിവുകളുണ്ടായിരുന്നതായാണ് റിപ്പോർട്ടുകൾ. മൃതദേഹത്തിന് സമീപം മൃഗത്തിന്റെ കാൽപ്പാടുകളും കണ്ടെത്തി. സ്ഥലത്തെത്തിയ വനംവകുപ്പ് ഉദ്യോഗസ്ഥർ കാൽപ്പാടുകൾ പരിശോധിച്ചശേഷം അവ ആൺപുള്ളിപ്പുലിയുടേതാണെന്ന് സ്ഥിരീകരിച്ചു. എന്നാൽ മരണത്തിന്റെ കൃത്യമായ കാരണം സ്ഥിരീകരിക്കുന്നതിന് പോസ്റ്റ്മോർട്ടം ഉൾപ്പെടെയുള്ള നടപടികൾ ആവശ്യമാണ്.
സംഭവം പ്രദേശവാസികളെ ആശങ്കയിലാഴ്ത്തിയിട്ടുണ്ട്. ഏതാനും ദിവസം മുമ്പ് പ്രദേശത്ത് പുള്ളിപ്പുലി കന്നുകാലിക്കുട്ടിയെ ആക്രമിച്ചതായും ഗ്രാമവാസികൾ പറയുന്നു. ഇതിനെക്കുറിച്ച് വനംവകുപ്പിനെ അറിയിച്ചിട്ടും മതിയായ മുൻകരുതൽ സ്വീകരിച്ചില്ലെന്നാണ് നാട്ടുകാരുടെ ആരോപണം. പൂജാരിയുടെ മരണത്തിന് പിന്നാലെ ഗ്രാമവാസികൾ പ്രതിഷേധിക്കുകയും പുള്ളിപ്പുലിയെ ഉടൻ പിടികൂടണമെന്ന് ആവശ്യപ്പെടുകയും ചെയ്തു.
സംഭവസ്ഥലം സന്ദർശിച്ച വനംവകുപ്പ് ഉദ്യോഗസ്ഥർ പുള്ളിപ്പുലിയെ കണ്ടെത്തി പിടികൂടുന്നതിനുള്ള നടപടികൾ സ്വീകരിക്കുമെന്ന് ഉറപ്പുനൽകി. മരിച്ചയാളുടെ കുടുംബത്തിന് ചട്ടപ്രകാരമുള്ള നഷ്ടപരിഹാരം നൽകുമെന്നും അധികൃതർ അറിയിച്ചു.
SUMMARY:Temple priest killed in leopard attack in Magadi.
