അഗുംബെ ചുരത്തിൽ തുരങ്കപാത; സാധ്യതാപഠനത്തിന് അനുമതി

ബെംഗളൂരു: ഉ‍ഡുപ്പി , ശിവമോഗ ജില്ലകളെ ബന്ധിപ്പിക്കുന്ന ദേശീയപാത 169A (NH-169A) യിലെ അഗുംബെ ഘട്ട് ഭാഗത്ത് തുരങ്കപാത നിർമ്മിക്കുന്നതിനുള്ള സാധ്യതകൾ പരിശോധിക്കുന്നതിനുള്ള നടപടികൾ റോഡ് ഗതാഗത, ദേശീയപാത മന്ത്രാലയം (MoRTH) ആരംഭിച്ചു. സാധ്യത പഠനത്തിനും വിശദമായ പദ്ധതി റിപ്പോർട്ട് സമർപ്പണത്തിനും 2.33 കോടിരൂപ അനുവദിച്ചതായി ലോക്സഭയിൽ മന്ത്രി നിതിൻ ഗഡ്കരി പറഞ്ഞു. ശിവമോഗ ലോക്‌സഭാംഗം ബി.വൈ.രാഘവേന്ദ്രയുടെ ചോദ്യത്തിന് മറുപടി നൽകുകയായിരുന്നു മന്ത്രി.

അഗുംബെ ചുരപാതയില്‍ മഴക്കാലത്ത് മണ്ണിടിയുന്നതിനെ തുടർന്ന് ആഴ്ചകളോളം ഗതാഗതം മുടങ്ങുന്നത് പതിവാണ്. പാതയിലെ ഗതാഗതം സുഗമമാക്കുന്നതിനായി  തുരങ്കപാത നിർമ്മിക്കാനുള്ള കേന്ദ്രപദ്ധതിയെകുറിച്ച് ബി വൈ രാഘവേന്ദ്ര വിശദമാക്കി. പാത നിലവിലുള്ള 30.75 കിലോമീറ്ററിൽ നിന്ന് 51.60 കിലോമീറ്ററായി നവീകരിക്കുന്നതിനുള്ള സാധ്യതാ പഠനം, വിശദമായ പദ്ധതി റിപ്പോർട്ട് (ഡിപിആർ), സർവേ, ഭൂമി ഏറ്റെടുക്കല്‍ എന്നിവ തയ്യാറാക്കുന്നതിനായി ഗതാഗത മന്ത്രാലയം ടെൻഡറുകൾ ക്ഷണിച്ചതായി അദ്ദേഹം പറഞ്ഞു.
SUMMARY: Tunnel at Agumbe Pass; Feasibility study approved