ബെംഗളൂരു ക്വിൻ സിറ്റി പദ്ധതി; താൽപര്യം പ്രകടിപ്പിച്ച് പ്രമുഖ സർവകലാശാലകൾ

ബെംഗളൂരു: ബെംഗളൂരു ക്വിൻ സിറ്റി പദ്ധതിയിൽ താൽപര്യം പ്രകടിപ്പിച്ച് പ്രമുഖ സർവകലാശാലകൾ. ഫെബ്രുവരി 13ന് നടക്കുന്ന ഗ്ലോബൽ ഇൻവെസ്റ്റേഴ്‌സ് മീറ്റിൽ (ജിഐഎം) സർവകലാശാകൾ സർക്കാരുമായി ധാരണാപത്രം ഒപ്പുവെക്കുമെന്ന് വ്യവസായ മന്ത്രി എം. ബി. പാട്ടീൽ പറഞ്ഞു. വിദ്യാഭ്യാസത്തിൻ്റെ ഹബ്ബായി ക്വിൻ സിറ്റിയെ വളർത്തിക്കൊണ്ടുവരനാണ് സംസ്ഥാന സർക്കാരിൻ്റെ ലക്ഷ്യം.

ജിഐഎമ്മിൽ ഉന്നത വിദ്യാഭ്യാസ മന്ത്രി ഡോ. എംസി സുധാകർ, മെഡിക്കൽ വിദ്യാഭ്യാസ, നൈപുണ്യ വികസന മന്ത്രി എസ് പ്രകാശ് പാട്ടീൽ എന്നിവർ ആതിഥേയത്വം വഹിക്കുമെന്ന് മന്ത്രി എംബി പാട്ടീൽ അറിയിച്ചു. വിദ്യാഭ്യാസം, ഗവേഷണം, നവീകരണം എന്നിവയിൽ ആഗോള രാജ്യങ്ങളുമായി സഹകരണം വളർത്തിയെടുക്കാൻ ലക്ഷ്യമിട്ടുള്ളതാണ് ജിഐഎം. അഞ്ചോ ആറോ വിദേശ സർവകലാശാലകളുമായും ആറ് മുതൽ എട്ടുവരെ ഇന്ത്യൻ സർവകലാശാലകളുമായും ധാരണാപത്രങ്ങളിൽ ഒപ്പുവെക്കുമെന്ന് പാട്ടീൽ പറഞ്ഞു.

വ്യാവസായിക നിക്ഷേപങ്ങളിൽ മാത്രം ശ്രദ്ധ കേന്ദ്രീകരിക്കാതെ ഉയർന്ന വൈദഗ്ധ്യമുള്ള തൊഴിൽ മേഖല സൃഷ്ടിക്കുക എന്ന ലക്ഷ്യത്തോടെ ഗവേഷണം, നൈപുണ്യ വികസനം, അനുബന്ധ മേഖലകൾ എന്നിവയ്ക്കും മുൻഗണന നൽകുമെന്ന് അദ്ദേഹം പറഞ്ഞു. യുജിസി മാനദണ്ഡങ്ങൾ പ്രകാരം ലോകത്തിലെ മികച്ച 500 സർവകലാശാലകൾക്ക് ഇന്ത്യയിൽ കാമ്പസുകൾ സ്ഥാപിക്കാൻ അനുമതിയുണ്ട്. ഈ സാഹചര്യം സർക്കാർ പ്രയോജനപ്പെടുത്തുമെന്നും പാട്ടീൽ ചൂണ്ടിക്കാട്ടി. അസിം പ്രേംജി സർവകലാശാല, പിഇഎസ് സർവകലാശാല, എംഎസ് രാമയ്യ സർവകലാശാല, മണിപ്പാൽ അക്കാദമി, ക്രൈസ്റ്റ് സർവകലാശാല എന്നിവയുൾപ്പെടെ നിരവധി പ്രമുഖ ഇന്ത്യൻ സർവകലാശാലകളെ ക്ഷണിച്ചിട്ടുണ്ട്.

ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസ് (ഐഐഎസ്‌സി), ജവഹർലാൽ നെഹ്‌റു സെന്റർ ഫോർ അഡ്വാൻസ്ഡ് സയന്റിഫിക് റിസർച്ച് (ജെഎൻസിഎഎസ്ആർ), നാഷണൽ ഇൻസ്റ്റിറ്റ്യൂട്ട് ഓഫ് മെന്റൽ ഹെൽത്ത് ആൻഡ് ന്യൂറോ സയൻസസ് (നിംഹാൻസ്), നാഷണൽ ലോ സ്കൂൾ ഓഫ് ഇന്ത്യ യൂണിവേഴ്‌സിറ്റി (എൻഎൽഎസ്ഐയു) തുടങ്ങിയ പ്രമുഖ ഗവേഷണ സ്ഥാപനങ്ങളും പരിപാടിയുടെ ഭാഗമാകും.

TAGS: KWIN CITY PROJECT
SUMMARY: Karnataka to sign MoUs with leading universities for KWIN City