ബെംഗളൂരുവിലെ വിവിധയിടങ്ങളിൽ 16 വരെ മദ്യവിൽപനയ്ക്ക് നിയന്ത്രണം

ബെംഗളൂരു: ഗണേശ വിഗ്രഹ നിമജ്ജനങ്ങളും ഘോഷയാത്രകളും നടക്കുന്നതിനാൽ സെപ്റ്റംബർ 16 വരെ നഗരത്തിൻ്റെ വിവിധ ഭാഗങ്ങളിൽ മദ്യവിൽപന നിരോധിച്ചതായി ബെംഗളൂരു സിറ്റി പോലീസ് കമ്മീഷണർ ബി. ദയാനന്ദ അറിയിച്ചു. ബാറുകൾ, റെസ്റ്റോറൻ്റുകൾ, വൈൻ ഷോപ്പുകൾ, പബ്ബുകൾ, മൈസൂരു സെയിൽസ് ഇൻ്റർനാഷണൽ ലിമിറ്റഡ് (എംഎസ്ഐഎൽ) ഔട്ട്ലെറ്റുകൾ എന്നിവിടങ്ങളിലാണ് മദ്യവിൽപ്പനയ്ക്ക് നിയന്ത്രണം ഏർപ്പെടുത്തുന്നത്.

ജെ.സി. നഗർ, ആർ.ടി. നഗർ, ഹെബ്ബാൾ, സഞ്ജയ് നഗർ, ഡി.ജെ. ഹള്ളി, ഭാരതി നഗർ, പുലകേശിനഗർ എന്നിവിടങ്ങളിൽ 16ന് രാവിലെ ആറ് വരെ മദ്യവിൽപ്പന നിരോധിച്ചിട്ടുണ്ട്. ഈസ്റ്റ്, നോർത്ത് ഈസ്റ്റ് ബെംഗളൂരുവിലെ എട്ട് പോലീസ് സ്റ്റേഷൻ പരിധികളിലും, കൊമേഴ്‌സ്യൽ സ്ട്രീറ്റ്, ഭാരതി നഗർ, ശിവാജിനഗർ, പുലകേശിനഗർ, ഹലസുരു, യെലഹങ്ക ന്യൂ ടൗൺ, വിദ്യാരണ്യപുര എന്നിവിടങ്ങളിലും 16ന് രാവിലെ ആറ് വരെ മദ്യവിൽപനയ്ക്ക് നിരോധനം ഏർപ്പെടുത്തും.

TAGS: BENGALURU | LIQUOR SALE
SUMMARY: Liquor sale banned in city till 16th of this month