നിയമസഭാ ഉപതിരഞ്ഞെടുപ്പ്; രണ്ട് മണ്ഡലങ്ങളില്‍ സ്ഥാനാർഥികളെ പ്രഖ്യാപിച്ച് ബി.ജെ.പി.

ബെംഗളൂരു : കർണാടകയില്‍ നിയമസഭാ ഉപതിരഞ്ഞെടുപ്പു നടക്കുന്ന മൂന്നുമണ്ഡലങ്ങളിൽ രണ്ടെണ്ണത്തിലേക്ക് ബി.ജെ.പി. സ്ഥാനാർഥികളെ പ്രഖ്യാപിച്ചു. ഷിഗോണിൽ മുൻമുഖ്യമന്ത്രി ബസവരാജ് ബൊമ്മെയുടെ മകൻ ഭരത് ബസവരാജ് ബൊമ്മെയും സന്ദൂരിൽ ബംഗരു ഹനുമന്തയുമാണ് ബിജെപിക്കുവേണ്ടി മത്സരിക്കുക. ചന്നപട്ടണയിൽ ജെ.ഡി.എസ്. സ്ഥാനാർഥിയാകും മത്സരിക്കുക. അതേസമയം ഇവിടെ സ്ഥാനാര്‍ഥിയെ ഇതുവരെ പ്രഖ്യാപിച്ചിട്ടില്ല. യുവജനതാദൾ അധ്യക്ഷൻ നിഖിൽ കുമാരസ്വാമിയാകും ജെ.ഡി.എസ്. സ്ഥാനാർഥിയാകുമെന്നാണ്  സൂചന.

ഷിഗോൺ ബി.ജെ.പി.യുടെയും സന്ദൂർ കോൺഗ്രസിന്റെയും ചന്നപട്ടണ ജെ.ഡി.എസിന്റെയും മണ്ഡലങ്ങളാണ്. ബസവരാജ് ബൊമ്മെ ലോക്‌സഭാംഗമായതിനാലാണ് ഷിഗോണിൽ ഉപതിരഞ്ഞെടുപ്പ് നടക്കുന്നത്. സന്ദൂരിലെ എം.എൽ.എ.യായിരുന്ന ഇ. തുക്കാറാം ലോക്‌സഭയിലെത്തിയതോടെയാണ് ആ മണ്ഡലത്തിൽ ഉപതിരഞ്ഞെടുപ്പിന് കളമൊരുങ്ങിയത്. കേന്ദ്രമന്ത്രി എച്ച്.ഡി. കുമാരസ്വാമി ലോക്‌സഭാംഗമായതാണ് ചന്നപട്ടണയിൽ ഉപതിരഞ്ഞെടുപ്പ് വരാൻ കാരണം.

നവംബർ 13-നാണ് തിരഞ്ഞെടുപ്പ്.
<BR>
TAGS : BY ELECTION
SUMMARY : Assembly by-elections. BJP announced candidates in two constituencies.