ബെംഗളൂരു: കാറും ട്രക്കും കൂട്ടിയിടിച്ചുണ്ടായ അപകടത്തിൽ സുഹൃത്തുക്കളായ അഞ്ച് പേർ മരിച്ചു. ചാമരാജനഗർ കൊല്ലെഗൽ താലൂക്കിലെ ചിക്കിന്തുവാടിക്ക് സമീപം ശനിയാഴ്ചയാണ് അപകടമുണ്ടായത്. മാലെ മഹാദേശ്വര്‍ ഹിൽസ് സന്ദര്‍ശിക്കുന്നതിനിടെ ട്രക്കും കാറും കൂട്ടിയിടിക്കുകയായിരുന്നു. മൈസൂരു സ്വദേശികളായ നികിത, ശ്രീലക്ഷ്മി, മാണ്ഡ്യയില്‍ നിന്നുള്ള സുഹാസ്, നിതിന്‍, ഇവരുടെ മറ്റൊരു സുഹൃത്ത് എന്നിവരാണ് മരിച്ചത്. ഇവരില്‍ നാലുപേര്‍ എഞ്ചിനീയറിംഗ് വിദ്യാര്‍ഥികളും, മറ്റൊരാൾ മൈസൂരുവിലെ എംഐടി കോളേജിലെ ഡിപ്ലോമ വിദ്യാര്‍ഥിയുമാണ്.
അഞ്ച് പേരും കൊല്ലെഗലില്‍ നിന്ന് മഹാദേശ്വര ഹിൽസിലേക്ക് പോകുന്നതിനിടെയാണ് അപകടം നടന്നത്. അമിതവേഗത്തിലെത്തിയ ട്രക്ക് ഇവരെ ഇടിക്കുകയായിരുന്നുവെന്ന് പോലീസ് പറഞ്ഞു. അപകടം നടന്നയുടൻ ട്രക്ക് ഡ്രൈവർ ഓടി രക്ഷപ്പെട്ടു. സംഭവത്തിൽ കൊല്ലെഗൽ പോലീസ് കേസെടുത്തു.
TAGS: ACCIDENT | KARNATAKA
SUMMARY: Five friends visiting Male Mahadeshwar Hills killed in road accident
WhatsApp
Telegram
