മലപ്പുറം: താനൂരില്‍ നിന്ന് ബെംഗളൂരുവിലേക്ക് പോയ യുവാവിനെ കണ്ടെത്തി. താനൂര്‍ സ്വദേശിയായ ഇംതിയാസിനെയാണ് (24) മഹാരാഷ്ട്രയിലെ നാഗ്പൂരില്‍ നിന്ന് കണ്ടെത്തിയത്. നഴ്സിങ് പഠനം പൂർത്തിയാക്കിയ സർട്ടിഫിക്കറ്റ് വാങ്ങാൻ ബെംഗളൂരുവിലേക്ക് പോയതിന് പിന്നാലെയായിരുന്നു കാണാതായത്.
കഴിഞ്ഞ ആറാം തീയതി വൈകുന്നേരം കോട്ടക്കലില്‍ നിന്ന് കെഎസ്‌ആര്‍ടിസി ബസിലാണ് ഇംതിയാസ് യാത്ര തിരിച്ചത്. ബെംഗളൂരുവില്‍ എത്തിയ വിവരം വീട്ടിലേക്ക് വിളിച്ചറിയിച്ചിരുന്നു. എന്നാല്‍ അതിനുശേഷം ബന്ധപ്പെടാന്‍ സാധിച്ചിട്ടില്ല. ഫോണ്‍ സ്വിച്ച്‌ഡ് ഓഫ് ആയിരുന്നു. കുടുംബം പരാതി നല്‍കിയതിനെത്തുടര്‍ന്ന് താനൂര്‍ പോലീസ് അന്വേഷണം ആരംഭിച്ചിരുന്നു. ഇംതിയാസിന്റെ സുഹൃത്തുക്കളും ഈ ഭാഗങ്ങളില്‍ അന്വേഷണം നടത്തിയിരുന്നു.
അതിനിടയില്‍ നാഗ്പൂരില്‍ നിന്ന് ഇംതിയാസിന്റെ ബാങ്ക് അക്കൗണ്ട് ഉപയോഗിച്ച് സ്വിഗ്ഗിയില്‍ ഭക്ഷണം ബുക്ക് ചെയ്തതായി കണ്ടെത്തി. മഹാരാഷ്ട്ര പോലീസ് തിരച്ചില്‍ നടത്തിയെങ്കിലും യുവാവിനെ കണ്ടെത്തിയിരുന്നില്ല. തുടര്‍ന്ന് താനൂര്‍ പോലീസ് നേരിട്ട് നാഗ്പൂരിലെത്തുകയായിരുന്നു. നാഗ്പൂരിലെ ഒരു അപ്പാര്‍ട്ട്‌മെന്റില്‍ യുവാവ് ഉണ്ടെന്ന് പോലീസിന് സൂചന ലഭിച്ചിരുന്നു. പ്രാദേശിക സഹായവും പോലീസ് തേടി. ഇംതിയാസുമായി പോലീസ് നാട്ടിലേക്ക് പുറപ്പെട്ടിട്ടുണ്ട്.
SUMMARY: Imtiyaz, a native of Tanur who had tone missing from Bengaluru, has been found
