ബെംഗളൂരു: കർണാടകയിലെ ബെളഗാവി ജില്ലയിലെ ഹുക്കേരി താലൂക്കിൽ ദുർഗാദേവിയുടെ വിഗ്രഹവുമായി പോയ ഘോഷയാത്രയിലേക്ക് ട്രക്ക് ഇടിച്ചുകയറി മൂന്നുപേർ മരിച്ചു. ഞായറാഴ്ച രാവിലെ ഹട്ടരഗി ടോൾ പ്ലാസയ്ക്കു സമീപമാണ് അപകടമുണ്ടായത്. പ്രകാശ്, മഹേഷ്, ദാനേശ്വരി എന്നിവരാണ് മരിച്ചത്. പത്തുപേരിലധികം പേർക്ക് പരുക്കേറ്റിട്ടുണ്ട്. ഇവരിൽ നാലുപേരുടെ നില ഗുരുതരമാണ്.
ബെളഗാവിയിൽനിന്ന് ദുർഗാദേവിയുടെ വിഗ്രഹം ഹുഞ്ച്യാനട്ടി ഗ്രാമത്തിലേക്ക് ഘോഷയാത്രയായി കൊണ്ടുപോകുകയായിരുന്ന ഭക്തരാണ് അപകടത്തിൽപ്പെട്ടത്. ഘോഷയാത്ര റോഡിലൂടെ നീങ്ങുന്നതിനിടെ പിന്നിൽനിന്നെത്തിയ ട്രക്ക് ഭക്തർക്കിടയിലേക്ക് ഇടിച്ചുകയറുകയായിരുന്നു. ഇടിയുടെ ആഘാതത്തിൽ നിരവധി പേർ റോഡിലേക്ക് തെറിച്ചുവീണു.
പരുക്കേറ്റവരെ ബെളഗാവി ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസ് (ബി.ഐ.എം.എസ്.) ആശുപത്രിയിലും സമീപത്തെ സ്വകാര്യ ആശുപത്രികളിലും പ്രവേശിപ്പിച്ചു. വിവരമറിഞ്ഞ് യമകനമർഡി പോലീസ് സ്ഥലത്തെത്തി രക്ഷാപ്രവർത്തനം നടത്തി. ട്രക്ക് ഘോഷയാത്രയിലേക്ക് ഇടിച്ചുകയറാനുണ്ടായ സാഹചര്യം, വാഹനത്തിന്റെ വേഗം, ഡ്രൈവറുടെ അശ്രദ്ധ തുടങ്ങിയ കാര്യങ്ങൾ അന്വേഷിച്ചുവരികയാണെന്ന് പോലീസ് അറിയിച്ചു. അപകടത്തിന്റെ കൃത്യമായ കാരണം സംബന്ധിച്ച അന്തിമ വിവരം പുറത്തുവന്നിട്ടില്ല.
SUMMARY: Truck rams into temple procession; three dead, over ten injured.
