ദഹ്റാൻ: സൗദിയിലെ അരാംകോ എണ്ണ കമ്പനിയുടെ ദഹ്റാനിലുള്ള ആസ്ഥാനത്തിന് നേരെ ഹൂതി വിമതരുടെ ആക്രമണം. ചൊവ്വാഴ്ച രാത്രിയാണ് ആസ്ഥാനത്തിന് സമീപം ശക്തമായ സ്ഫോടന ശബ്ദങ്ങൾ കേട്ടത്. ആക്രമണത്തെത്തുടർന്ന് കെട്ടിടത്തിൽ തീപിടിത്തമുണ്ടായെങ്കിലും ആളപായമോ പരുക്കുകളോ റിപ്പോർട്ട് ചെയ്തിട്ടില്ലെന്ന് സൗദി പ്രസ് ഏജൻസി അറിയിച്ചു. നാല് മിസൈലുകളും അഞ്ച് ഡ്രോണുകളും ഉപയോഗിച്ചായിരുന്നു ആക്രമണം. മിസൈലുകളും ഡ്രോണുകളും പ്രതിരോധിച്ചെന്ന് സൗദി സഖ്യസേന അറിയിച്ചു. മിസൈൽ അവശിഷ്ടങ്ങൾ വീണ് കെട്ടിടത്തിൽ തീപ്പിടിത്തം ഉണ്ടാകുകയായിരുന്നു. ഇതോടെ യെമനിലെ ഹൂതിവിമതരും സൗദി സഖ്യസേനയും തമ്മിലുള്ള ഏറ്റുമുട്ടല്‍ രൂക്ഷമാകുന്നുവെന്നാണ് റിപ്പോര്‍ട്ടുകള്‍.
യെമൻ തലസ്ഥാനമായ സനയിലെ എണ്ണ കേന്ദ്രത്തിന് നേരെ സൗദി സഖ്യസേന വ്യോമാക്രമണം നടത്തിയതിന് പിന്നാലെയാണ് ഹൂതികളുടെ തിരിച്ചടി. അരാംകോയ്ക്കു നേരെ ആക്രമണം നടത്തുമെന്നും സൗദി എണ്ണ കേന്ദ്രങ്ങൾക്ക് സമീപമുള്ള ജീവനക്കാരും സാധാരണക്കാരും ഒഴിഞ്ഞുപോകണമെന്നും കഴിഞ്ഞ ദിവസം ഹൂതി വക്താവ് യഹ്യ സരീ മുന്നറിയിപ്പ് നൽകിയിരുന്നു.
അതേസമയം റിയാദിൽ മിസൈൽ അവശിഷ്ടങ്ങൾ പതിച്ച് നാലുപേർക്ക് പരിക്കേൽക്കുകയും 15 വീടുകൾക്ക് കേടുപാടു സംഭവിക്കുകയും ചെയ്തതായി അധികൃതർ വ്യക്തമാക്കി.
SUMMARY: Houthi attack on Aramco headquarters in Saudi Arabia; fire breaks out in the building.
