ബെംഗളൂരു: എസ്.പി ഓഫീസ് വളപ്പില്‍ വച്ച് ഭാര്യയെ കുത്തിക്കൊലപ്പെടുത്തിയ പോലീസ് കോണ്‍സ്റ്റബിള്‍ അറസ്റ്റിൽ. ഹാസന്‍ ജില്ലയില്‍ തിങ്കളാഴ്ചയായിരുന്നു സംഭവം. ശാന്തിഗ്രാമയിലെ സർക്കിൾ ഇൻസ്‌പെക്ടറുടെ ഓഫീസിൽ ജോലി ചെയ്യുകയായിരുന്നു ലോകനാഥാണ്(48) അറസ്റ്റിലായത്. മമത (37) ആണ് കൊല്ലപ്പെട്ടത്.
കുടുംബ വഴക്കാണ് കൊലപാതകത്തിന് കാരണമെന്ന് പ്രാഥമിക അന്വേഷണത്തിൽ പോലീസ് കണ്ടെത്തി. ഭർത്താവിനെതിരെ പരാതി നൽകാൻ മമത ഹാസന്‍ എസ്പി ഓഫീസിൽ എത്തിയപ്പോഴായിരുന്നു സംഭവം. ഇതിൽ രോഷാകുലനായ ലോകനാഥ്, ഭാര്യയുടെ നെഞ്ചിൽ കുത്തുകയും പോലീസുകാരും ആളുകളും നോക്കിനില്‍ക്കെ മമതയെ കൊലപ്പെടുത്തുകയുമായിരുന്നു. ഉടന്‍ തന്നെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.
19 വര്‍ഷം മുമ്പായിരുന്നു ലോകനാഥിന്‍റെയും മമതയുടെയും വിവാഹം. രണ്ട് മക്കളും ഇവര്‍ക്കുണ്ട്. ഇരുവരും തമ്മില്‍ നിരന്തരം വഴക്കുണ്ടാവുമായിരുന്നു. നാല് ദിവസം മുമ്പും വഴക്കുണ്ടായിരുന്നു. സംഭവത്തിൽ ഹാസൻ സിറ്റി പോലീസ് ഇയാൾക്കെതിരെ ഭാരതീയ ന്യായസംഹിത പ്രകാരം കേസെടുത്തു.
TAGS: KARNATAKA | ARREST
SUMMARY: Police constable arrested for killing wife at sp office
