ബെംഗളൂരു: ജൂൺ 21-ന് ബെംഗളൂരു വിധാൻസൗധയിൽ സംഘടിപ്പിക്കുന്ന അന്താരാഷ്ട്ര യോഗ ദിനാചരണത്തില്‍ മൂവായിരംപേർ പങ്കെടുമെന്ന്‌ ആരോഗ്യമന്ത്രി ദിനേശ് ഗുണ്ടുറാവു അറിയിച്ചു. രാവിലെ 6 മുതൽ 8 വരെയാണ് പരിപാടി. ഗവർണർ താവർചന്ദ് ഗഹ്‌ലോത് ചടങ്ങ് ഉദ്ഘാടനം ചെയ്യും. മുഖ്യമന്ത്രി സിദ്ധരാമയ്യ, ഉപമുഖ്യമന്ത്രി ഡി.കെ. ശിവകുമാർ എന്നിവർ പങ്കെടുക്കും.
യോഗസംഗമം എന്ന് പേരിട്ടിരിക്കുന്ന പരിപാടി യോഗ സംഘടനകൾ, സിവിൽ സൊസൈറ്റി ഗ്രൂപ്പുകൾ എന്നിവരുടെ സഹകരണത്തോടെയാണ് സംഘടിപ്പിക്കുന്നത്. സംസ്ഥാനത്തെ പ്രമുഖ യോഗ പരിശീലകരും പരിപാടിയുടെ ഭാഗമാകും. ആയുഷ് മന്ത്രാലയത്തിന്റെ നിര്‍ദേശപ്രകാരമുള്ള യോഗ പ്രോട്ടോക്കോൾ അനുസരിച്ചുള്ള 45 മിനിറ്റ് സെഷൻ ആയിരിക്കും പരിപാടിയുടെ പ്രധാന സവിശേഷത.
ജില്ലാ, താലൂക്ക് തലങ്ങളിലും യോഗ ദിനാചരണം സംഘടിപ്പിക്കുമെന്ന് ആരോഗ്യമന്ത്രി അറിയിച്ചു. സംസ്ഥാനത്തെ 300 ആയുഷ്മാൻ ഹെൽത്ത് ആൻഡ് വെൽനസ് സെന്ററുകൾ വിവിധ ഇടങ്ങളില്‍ യോഗ ദിന പരിപാടികൾ സംഘടിപ്പിക്കും. മൈസൂരു പാലസ് ഗ്രൗണ്ടിൽ 15,000 പേർ പങ്കെടുക്കുന്ന യോഗാ ദിനാചരണവും നടക്കും.
SUMMARY: International Yoga Day celebration; 3000 people will participate in the yoga meet at Vidhan Soudha
