ബെംഗളൂരു: ബിബിഎംപി വിഭജിച്ച് രൂപീകരിക്കുന്ന പുതിയ 5 കോർപറേഷനുകളിലെ തിരഞ്ഞെടുപ്പ് നവംബറിനു ശേഷം നടത്തുമെന്ന് ഉപമുഖ്യമന്ത്രി ഡി.കെ. ശിവകുമാർ അറിയിച്ചു. കോർപറേഷനുകളുടെയും വാർഡുകളുടെയും അതിർത്തി നിർണയിക്കുന്ന നടപടികൾ 4 മാസത്തിനകം പൂർത്തിയാക്കാനാണ് ഉദ്ദേശിക്കുന്നതെന്ന് അദ്ദേഹം പറഞ്ഞു.
കോർപറേഷനുകളുടെ അതിർത്തി സംബന്ധിച്ച് പൊതുജനങ്ങളുടെ ആശങ്കകൾ ഓഗസ്റ്റ് 18ന് മുന്നോടിയായി അറിയിക്കാം. സെപ്റ്റംബർ 2ന് അന്തിമ വിജ്ഞാപനം ഉണ്ടാകും. വാർഡുകളുടെ അതിർത്തി നിർണയിക്കാനുള്ള സമിതിയെ സെപ്റ്റംബർ 3ന് നിയോഗിക്കും. നവംബർ ഒന്നോടെ വാർഡുകളുടെ അതിർത്തി നിർണയം പൂർത്തിയാക്കും. ബിബിഎംപി തിരഞ്ഞെടുപ്പിലെ കാലതാമസം സംബന്ധിച്ച ഹർജിയിൽ സുപ്രീംകോടതിയെ ഇക്കാര്യങ്ങൾ ധരിപ്പിക്കുമെന്നും അദ്ദേഹം പറഞ്ഞു.
2015 ഏപ്രിലിലാണ് ഒടുവിൽ ബിബിഎംപി തിരഞ്ഞെടുപ്പ് നടന്നത്. വാർഡുകളുടെ എണ്ണം 198ൽ നിന്ന് 243 ആയി ഉയർത്തുന്നതിന്റെ ഭാഗമായാണ് കഴിഞ്ഞ ബിജെപി സർക്കാർ തിരഞ്ഞെടുപ്പ് വൈകിപ്പിച്ചത്. 5 കോർപറേഷനുകളായി വിഭജിക്കുന്നതിന്റെ ഭാഗമായാണ് സിദ്ധരാമയ്യ സർക്കാർ തിരഞ്ഞെടുപ്പ് നീട്ടുന്നത്.
SUMMARY: Deputy Chief Minister D.K. Shivakumar states that BBMP elections will take place after November.
