ബെംഗളൂരുവിൽ പുതിയ ക്രിക്കറ്റ് സ്റ്റേഡിയം വരുന്നു

ബെംഗളൂരു: ബെംഗളൂരുവിൽ പുതിയ ക്രിക്കറ്റ് സ്റ്റേഡിയം നിർമിക്കുന്നു. കർണാടക ഭവന ബോർഡാണ് സ്റ്റേഡിയം നിർമിക്കുന്നത്. പദ്ധതിക്ക് സർക്കാർ അംഗീകാരം നൽകി. ബൊമ്മസാന്ദ്ര സൂര്യ സിറ്റിയിൽ 100 ഏക്കർ സ്ഥലത്താണ് സ്റ്റേഡിയം നിർമിക്കുന്നത്. 1,650 കോടി രൂപ ചെലവിൽ നിർമിക്കുന്ന 80,000 പേരെ ഉൾക്കൊള്ളാൻ ശേഷിയുള്ള പുതിയ സ്റ്റേഡിയം ഇന്ത്യയിലെ രണ്ടാമത്തെ വലിയ ക്രിക്കറ്റ് സ്റ്റേഡിയമായിരിക്കും.

നഗരമധ്യത്തിലുള്ള ചിന്നസ്വാമി സ്റ്റേഡിയത്തിനു പകരം കൂടുതൽ സൗകര്യമുള്ള പുതിയ ക്രിക്കറ്റ് സ്റ്റേഡിയം വേണമെന്ന ആവശ്യമുയരുന്നതിനിടെയാണ് ഭവന ബോർഡിന്റെ പദ്ധതിക്ക് സർക്കാർ അംഗീകാരം നൽകിയത്. ചിന്നസ്വാമി സ്റ്റേഡിയത്തിന് 32,000 പേരെ ഉൾക്കൊള്ളാനുള്ള ശേഷിയാണുള്ളത്. കഴിഞ്ഞ ജൂണിൽ നടന്ന ആർസിബിയുടെ ഐപിഎൽ കിരീട ആഘോഷത്തിനിടെ 11 ക്രിക്കറ്റ് ആരാധകരുടെ ജീവൻ പൊലിഞ്ഞ സംഭവത്തോടെ ചിന്നസ്വാമി സ്റ്റേഡിയത്തിലെ അസൗകര്യങ്ങൾ ചർച്ചയായിരുന്നു.
SUMMARY: A new cricket stadium is coming to Bengaluru.