സ്മാർട്ട്ഫോണുകളിൽ 'സഞ്ചാർ സാഥി' ആപ്പ് പ്രീ-ഇൻസ്റ്റാൾ ചെയ്യാനുള്ള ഉത്തരവ് കേന്ദ്രം പിൻവലിച്ചു

ന്യൂഡല്‍ഹി: സഞ്ചാർ സാഥി ആപ്പ് നിബന്ധനയിൽ യു ടേണ്‍ എടുത്ത് കേന്ദ്ര സർക്കാര്‍. ആപ്പ് നിർബന്ധിതമായി പ്രീ ഇൻസ്റ്റാൾ ചെയ്യേണ്ടതില്ലെന്ന് കേന്ദ്ര സർക്കാര്‍ വ്യക്തമാക്കി. ആപ്പിന് ജനങ്ങൾക്കിടയിൽ സ്വീകാര്യത കൂടി വരുന്നത് പരിഗണിച്ച് ഉത്തരവ് പിൻവലിക്കുന്നുവെന്നാണ് കേന്ദ്രത്തിന്‍റെ വിശദീകരണം.

ഫോൺ നിർമാതാക്കൾ അവരുടെ ഉപകരണങ്ങളിൽ ആപ്പ് മുൻകൂട്ടി ലോഡ് ചെയ്യണമെന്നും പഴയ ഫോണുകൾ ഈ ആപ്പ് ഉപയോഗിച്ച് അപ്‌ഡേറ്റ് ചെയ്യണമെന്നും സർക്കാർ ഉത്തരവിട്ടതിനെ തുടർന്ന് ആപ്പുമായി ബന്ധപ്പെട്ട സ്വകാര്യത ആശങ്കകളെക്കുറിച്ച് പാർലമെൻ്റിൽ നടന്നുകൊണ്ടിരിക്കുന്ന ചർച്ചകൾക്കിടയിലാണ് ഈ തീരുമാനം. ഉത്തരവിനെതിരെ ആപ്പിൾ നിയമനടപടിക്ക് ഒരുങ്ങുകയായിരുന്നുവെന്ന റിപ്പോർട്ടുകളും പുറത്തുവന്നിരുന്നു. സർക്കാർ നിരീക്ഷണത്തിനും വ്യക്തിഗത ആശയവിനിമയങ്ങളിലേക്കുള്ള കടന്നുകയറ്റത്തിനുമുള്ള സാധ്യതകൾ ചൂണ്ടിക്കാട്ടി നിരവധി പ്രതിപക്ഷ അംഗങ്ങൾ ഈ നീക്കത്തെ വിമർശിച്ചിരുന്നു.

സൈബർ തട്ടിപ്പിൽ നിന്ന് ഉപയോക്താക്കളെ സംരക്ഷിക്കുന്നതിനും, ദുരുദ്ദേശ്യപരമായ പ്രവർത്തനങ്ങൾ റിപ്പോർട്ട് ചെയ്യാൻ അവരെ സഹായിക്കുന്നതിനും, സൈബർ കുറ്റകൃത്യങ്ങൾക്കെതിരെ പോരാടുന്നതിൽ പൊതുജന പങ്കാളിത്തം ശക്തിപ്പെടുത്തുന്നതിനും വേണ്ടി മാത്രമാണ് ആപ്പ് രൂപകൽപ്പന ചെയ്‌തിരിക്കുന്നതെന്ന് സർക്കാർ അവകാശപ്പെട്ടിരുന്നു. നിലവിൽ 1.4 കോടി ഉപയോക്താക്കൾ ഈ ആപ്പ് ഡൗൺലോഡ് ചെയ്തിട്ടുണ്ട്. പ്രതിദിനം 2000 തട്ടിപ്പ് സംഭവങ്ങളെക്കുറിച്ചുള്ള വിവരങ്ങൾ ആപ്പ് വഴി ലഭിക്കുന്നുണ്ട്. ഉപയോക്താക്കളുടെ എണ്ണം അതിവേഗം വർധിക്കുന്ന സാഹചര്യത്തിൽ, സൈബർ സുരക്ഷയെക്കുറിച്ച് കുറഞ്ഞ അവബോധമുള്ള പൗരന്മാർക്ക് എളുപ്പത്തിൽ ആപ്പ് ലഭ്യമാക്കാനാണ് പ്രീ-ഇൻസ്റ്റലേഷൻ നിർബന്ധമാക്കാൻ തീരുമാനിച്ചത്. കഴിഞ്ഞ ഒരു ദിവസത്തിനുള്ളിൽ ആറ് ലക്ഷം പേരാണ് ആപ്പ് ഡൗൺലോഡ് ചെയ്തത്. ഇത് ആപ്പിന്റെ സ്വീകാര്യത പത്തിരട്ടി വർധിച്ചതായി സൂചിപ്പിക്കുന്നു. സർക്കാർ നൽകുന്ന ഈ സുരക്ഷാ സംവിധാനത്തിലുള്ള ജനങ്ങളുടെ വിശ്വാസമാണ് ഇത് ഉറപ്പിക്കുന്നതെന്നും സർക്കാർ വിശദീകരിച്ചു.
SUMMARY: Centre withdraws order to pre-install ‘Sanchar Saathi’ app on smartphones