ബെംഗളൂരു: വിമാനം നഷ്ടപ്പെട്ടെന്നും യാത്ര തുടരാൻ പണമില്ലെന്നും കള്ളം പറഞ്ഞ് വിമാനത്താവളത്തിലെ യാത്രക്കാരിൽനിന്ന് പണം തട്ടിയ ഡൽഹി സ്വദേശി പോലീസിന്റെ പിടിയിലായി. ഡൽഹി സ്വദേശിയായ അമീൻ (37) ആണ് ബെംഗളൂരു കെംപെഗൗഡ അന്താരാഷ്ട്ര വിമാനത്താവളത്തിൽവെച്ച് പിടിയിലായത്.
ഒക്ടോബർ 9-ന് യാത്രക്കാരുടെ പരാതിയെത്തുടർന്ന് വിമാനത്താവളത്തിലെ സുരക്ഷാ ഉദ്യോഗസ്ഥരാണ് ഇയാളെ കസ്റ്റഡിയിലെടുത്ത് വിമാനത്താവള പോലീസിന് കൈമാറിയത്.
വിമാനത്താവളത്തിലെത്തുന്ന യാത്രക്കാരെ സമീപിക്കുന്ന ഇയാൾ, വിമാനം നഷ്ടപ്പെട്ടെന്നും തുടർയാത്രയ്ക്കായി കൈയിൽ പണമില്ലെന്നും പറഞ്ഞ് സഹായം അഭ്യർത്ഥിക്കുകയായിരുന്നു പതിവ്. 500 മുതൽ 1,000 രൂപ വരെയാണ് ഇയാൾ ഒരോരുത്തരോടും ആവശ്യപ്പെട്ടിരുന്നത്. സഹതാപം തോന്നി പലരും ഇയാൾക്ക് പണം നൽകുകയും ചെയ്തു. ഇത്തരത്തിൽ ഏകദേശം 3,000 രൂപയോളം ഇയാൾ സമാഹരിച്ചതായാണ് വിവരങ്ങൾ.
തട്ടിപ്പ് വ്യക്തമായതോടെ സുരക്ഷാ ഉദ്യോഗസ്ഥർ യാത്രാരേഖകൾ ആവശ്യപ്പെട്ടെങ്കിലും ടിക്കറ്റുകളൊന്നും ഹാജരാക്കാൻ ഇയാൾക്ക് കഴിഞ്ഞില്ല. തുടർന്ന് നടത്തിയ പരിശോധനയിൽ, സെപ്റ്റംബർ 30-ന് മുംബൈയിൽനിന്ന് ബെംഗളൂരുവിലെത്തിയ ഇയാൾ ഒക്ടോബർ 3-ന് ചെന്നൈയിലേക്ക് യാത്ര ചെയ്തിരുന്നതായും കണ്ടെത്തി.
സംഭവത്തിൽ ഇയാൾക്കെതിരെ പോലീസ് ‘നോൺ-കോഗ്നിസബിൾ’ കേസ് രജിസ്റ്റർ ചെയ്തിട്ടുണ്ട്. മറ്റ് വിമാനത്താവളങ്ങളിലും ഇയാൾ സമാനരീതിയിൽ തട്ടിപ്പ് നടത്തിയിട്ടുണ്ടോ എന്ന് പോലീസ് അന്വേഷിച്ചു വരികയാണ്.
അടിയന്തര സഹായമെന്ന പേരിൽ അപരിചിതരായ വ്യക്തികൾ പണം ആവശ്യപ്പെടുകയാണെങ്കിൽ യാത്രക്കാർ ജാഗ്രത പാലിക്കണമെന്നും, സംശയകരമായ സാഹചര്യങ്ങൾ ശ്രദ്ധയിൽപ്പെട്ടാൽ ഉടൻതന്നെ വിമാനത്താവള സുരക്ഷാ ഉദ്യോഗസ്ഥരെ വിവരമറിയിക്കണമെന്നും അധികൃതർ മുന്നറിയിപ്പ് നൽകി.
SUMMARY: Delhi native arrested at Bengaluru airport for swindling money from passengers by claiming to have missed a flight and lacking funds to continue the journey.
