ഓൺലൈൻ വാതുവെയ്പിൽ പണം നഷ്ടമായി ; കടം വീട്ടാൻ ജോലി ചെയ്തിരുന്ന കമ്പനിയിൽ നിന്നു ലാപ്ടോപ്പും ഐഫോണും മോഷ്ടിച്ച് എൻജിനീയർ

ബെംഗളൂരു: ജോലി ചെയ്തിരുന്ന സ്വകാര്യ കമ്പനിയിൽ നിന്ന് 56 ലാപ്ടോപ്പും 19 ഐഫോണും മോഷ്ടിച്ച എൻജിനീയർ അറസ്റ്റിൽ. ബെംഗളൂരുവിലെ സ്വകാര്യ കമ്പനിയിലെ ജീവനക്കാരനായ പുട്ടൂർ സ്വദേശിയായ സുബ്രഹ്മണ്യ പ്രസാദാണ്(32) അറസ്റ്റിലായത്. ഓൺലൈൻ വാതുവെയ്പിൽ പണം നഷ്ടപ്പെട്ട് സുബ്രഹ്മണ്യ വൻ കടകെണിയിലായിരുന്നു. ഇതിൽ നിന്നു കരകയറാനാണ് മോഷണം നടത്തിയത്.

കഴിഞ്ഞ 5 വർഷമായി പാരപ്പന അഗ്രഹാരയ്ക്കു സമീപം പ്രവർത്തിക്കുന്ന സ്വകാര്യ കമ്പനിയിലെ ഐടി ആൻഡ് സ്റ്റോർ റൂം വിഭാഗം തലവനായിരുന്നു സുബ്രഹ്മണ്യ. ഓൺലൈൻ വാതുവയ്പിൽ നഷ്ടം സംഭവിച്ചതോടെ ഇയാൾ ലക്ഷക്കണക്കിനു രൂപയുടെ കടക്കെണിയിലായി.

കടം വീട്ടാൻ കമ്പനിയിലെ സ്റ്റോർ റൂമിൽ നിന്നു 56 ലാപ്ടോപ്പുകളും 16 ഐഫോണുകളും മോഷ്ടിക്കുകയായിരുന്നു. ഇതിൽ ചിലത് സുഹൃത്തുക്കൾക്കു വിറ്റു. ശേഷിക്കുന്ന 30 ലാപ്ടോപ്പുകളും 5 ഐഫോണും താമസ സ്ഥലത്ത് ഒളിപ്പിച്ചു വച്ചിരിക്കുകയായിരുന്നു. ഇവ പോലീസ് പിടിച്ചെടുത്തു.

SUMMARY: Engineer steals laptops and Iphone to repay loans