ബെംഗളൂരു: ബെംഗളൂരു – തുമകൂരു മെട്രോ പദ്ധതി യാഥാർഥ്യത്തിലേക്ക്. 56.6 കിലോമീറ്റർ ദൈർഘ്യമുള്ള ലൈനിൻ്റെ സാധ്യതാ പഠന റിപ്പോർട്ട് പൂർത്തിയാക്കി. റിപ്പോർട്ട് ബിഎംആർസിഎൽ സംസ്ഥാന സർക്കാരിന് കൈമാറി. ബെംഗളൂരുവിനെ മറ്റൊരു ജില്ലയുമായി മെട്രോ സർവീസ് മുഖേനെ ബന്ധിപ്പിക്കുന്ന ആദ്യ പദ്ധതിയാകും ഇത്. ഏറെ തിരക്കുള്ള ബെംഗളൂരു നഗരത്തിൽ നിന്ന് തുമകൂരുവിലേക്കുള്ള യാത്ര സുഗമമാക്കും. ഐടി രംഗത്ത് ഉൾപ്പെടെ ജോലി ചെയ്യുന്നവർക്ക് ഏറെ പ്രയോജനകരമാകുന്നതാണ് ഈ റൂട്ട് എന്ന് ബിഎംആർസിഎൽ ചീഫ് പബ്ലിക് റിലേഷൻസ് ഓഫീസർ യശ്വന്ത് ചവാൻ വ്യക്തമാക്കി.
മാധവാര, മകാലി, ദസനപുര, നെലമംഗല, വീവർസ് കോളനി, നെലമംഗല – വിശ്വേശ്വരപുര, നെലമംഗല ടോൾഗേറ്റ്, ബൂഡിഹാൾ, ടി ബേഗൂർ, തിപ്പഗൊണ്ടനഹള്ളി, കുലവനഹള്ളി, മഹിമാപുർ, ബില്ലൻകോട്ട്, സോമപുര ഇൻഡസ്ട്രിയൽ ഏരിയ, ദബാസ്പേട്ട്, നല്ലയാനപാളയ, ചിക്കഹള്ളി, ഹിരേഹള്ളി ഇൻഡസ്ട്രിയൽ ഏരിയ, പണ്ഡിതനഹള്ളി, കത്സാന്ദ്ര ബൈപാസ്, കത്സാന്ദ്ര, എസ്ഐടി, തുമകുരു ബസ് സ്റ്റാൻഡ്, തൂഡ ലേഔട്ട്, നാഗനപാളയ, ഷിറ ഗേറ്റ് എന്നിവടങ്ങളിലൂടെയാകും ലൈൻ കടന്നുപോകുക. മെട്രോ ഗ്രീൻ ലൈനിലെ മാധവാര (ബിഐഇസി) സ്റ്റേഷനിൽ നിന്ന് ആരംഭിച്ച് തുമകൂരു ഷിറ ഗേറ്റുവരെ പാത നീട്ടുമെന്ന് അദ്ദേഹം പറഞ്ഞു. റൂട്ടിൽ 25 എലിവേറ്റഡ് സ്റ്റേഷനുകളും ഉൾപ്പെടുന്നുണ്ട്. സാധ്യതാ റിപ്പോർട്ട് പഠിച്ച് സംസ്ഥാന സർക്കാർ പദ്ധതിക്ക് വൈകാതെ അനുമതി നൽകിയേക്കുമെന്നാണ് റിപ്പോർട്ട്.
TAGS: BENGALURU | NAMMA METRO
SUMMARY: Feasibility study of bengaluru tumkur metro completed
WhatsApp
Telegram
