ബെംഗളൂരു: തുമക്കൂരു ചിക്കനായകനഹള്ളി ഗോഡെഗെരെ ഗേറ്റില്‍ കാറുകള്‍ തമ്മില്‍ കൂട്ടിയിടിച്ച് മൂന്നു വയസുകാരിയടക്കം നാല് പേര്‍ മരിച്ചു. തുരുവേക്കരെ നിവാസികളായ ദാവൂദ് പാഷ (31), മകള്‍ അനാം പാഷ (3), അനില്‍ (32), വിവേക് (31) എന്നിവരാണ് മരിച്ചത്. വെള്ളിയാഴ്ച രാത്രി 8 മണിയോടെയാണ് അപകടമുണ്ടായത്. നാല് പേരും സംഭവസ്ഥലത്ത് തന്നെ മരിച്ചു. ഗര്‍ഭിണിയുള്‍പ്പെടെ മൂന്ന് പേര്‍ക്ക് ഗുരുതരമായി പരിക്കേറ്റു
ഭാര്യ യാസിക്‌സ് താജിനും മരുമകള്‍ സിമ്രാനുമൊപ്പം ഒരു ദര്‍ഗ സന്ദര്‍ശിച്ച ശേഷം വീട്ടിലേക്ക് മടങ്ങുകയായിരുന്നു ദാവൂദ് പാഷ. വിവേകും സംഘവും സുഹൃത്തുക്കളെ കണ്ട് മടങ്ങുകയായിരുന്നു. വിവേക് സഞ്ചരിച്ച കാര്‍ നിയന്ത്രണം നഷ്ടപ്പെട്ട് പാഷയുടെ കാറില്‍ ഇടിക്കുകയായിരുന്നു. കൂട്ടിയിടിയില്‍ രണ്ട് കാറുകളും പൂര്‍ണ്ണമായും തകര്‍ന്നു. കൂട്ടിയിടിയുടെ ആഘാതത്തില്‍ തകര്‍ന്ന വാഹനങ്ങളില്‍ നിന്ന് പരുക്കേറ്റവരെ പുറത്തെടുക്കാന്‍ സമയം ഏറെ എടുത്തു. പരുക്കേറ്റവരെ ചിക്കനായകനഹള്ളി സര്‍ക്കാര്‍ ആശുപത്രിയിലേക്ക് മാറ്റിയതായും അപകടത്തില്‍ കൂടുതല്‍ അന്വേഷണം പുരോഗമിക്കുകയാണെന്നും പോലീസ് പറഞ്ഞു.
